فرانسيانىڭ بىرنەشە مۇناي وڭدەۋ زاۋىتىندا جۇمىسشىلار ەرەۋىلى جالعاسىپ جاتىر

«فرانسياداعى جانارماي قۇيۋ ستانتسيالارىندا بىرنەشە كۇن بويى ۇزىنسونار كەزەك ورناعانى - TotalEnergies- ءتىڭ ءۇش مۇناي وڭدەۋ زاۋىتىندا ۇلكەن ەرەۋىلدىڭ ناتيجەسى»، - دەپ جازدى دۇيسەنبىدە فرانسيانىڭ La Croix گازەتى.

«TotalEnergiesتەگى ەرەۋىل سەيسەنبى كۇنى تاڭەرتەڭ باستالدى. ەل ۇكىمەتى تاراپىنان قىسىم كۇشەيگەنىنە قاراماستان، CGT وداعىنىڭ ۇندەۋىنە كوپ ادام شىقتى» دەيدى CGT ۇيلەستىرۋشىسى ەريك سەلليني.

«بۇگىن تاڭەرتەڭ قىزمەتكەرلەردىڭ باسىم كوپشىلىگى ەرەۋىلدى جالعاستىرۋدى جاقتاپ داۋىس بەردى. ءبىز ءالى دە باسشىلىقپەن كەلىسسوزدىڭ ەگجەي- تەگجەيىن كۇتەمىز»، - دەپ جازادى بەلگيالىق Le Soir.

فرانسيادا بارلىعى 3,5 مىڭ جانارماي قۇيۋ ستانسياسى بار بولسا، ءاربىر ءۇشىنشى جانارماي قۇيۋ ستانسياسى TotalEnergies كە تيەسىلى.

فرانسۋز اقپارات قۇرالدارى الەمدەگى ەڭ ءىرى ەنەرگەتيكالىق كورپوراتسيالاردىڭ بىرىندە جۇمىسشىلار ەرەۋىلى وسى كۇندەرى اياقتالادى دەگەن ءۇمىت بار دەپ جازدى.

جەكسەنبىدە باسشىلىق جۇمىسشىلار جالاقىسى تۋرالى كەلىسسوزدى جالعاستىرۋعا كەلىسىپ، ەڭبەككەرلەردىڭ جۇمىسقا قايتا كىرىسۋىن سۇرادى.

ولاي بولعانىمەن، CGT جۇمىسشىلارىنىڭ سولشىل كاسىپوداعى كومپانيا باسشىلىعىن «بوپسالادى» دەپ ايىپتاپ، بۇل ۇسىنىستى قابىلدامادى.

TotalEnergies ءتىڭ ءبىرىنشى توقسانداعى 10,6 ميلليارد دوللار كولەمىندەگى تابىسىن ءسوز ەتكەن كاسىپوداق 2022 -جىلى جۇمىسشىلار جالاقىسىن 10 پايىز كوتەرۋدى تالاپ ەتىپ وتىر.