جەتىسۋ وبلىسىندا كۇرىش ورۋ ناۋقانى اياقتالىپ كەلەدى

استانا. قازاقپارات - ديحاندار اۋا رايى قولايلى بولسا، جايقالعان ءونىمدى بىرەر اپتادا جيناپ الامىز دەپ وتىر. ارمان احمەتبايەۆ ءاربىر جايما شۋاق كۇندى پايدالانىپ، جازداعى ەڭبەگىنىڭ وتەمىن شاشاۋ شىعارماي جيناپ الۋعا تىرىسىپ جاتىر.

الدىڭعى جىلعى قۇرعاقشىلىقتان جاپا شەككەن شارۋا ەكى جىلدان بەرى جەرىنىڭ جارتىسىن عانا يگەرىپ كەلەدى.

ارمان احمەتبايەۆ، شارۋا:

- الدىڭعى جىلى 500 گەكتار، ال بىلتىر جانە بيىل ەكى ەسە از ەكتىك. ويتكەنى سۋ تاپشىلىعى قايتالانا ما دەپ قاۋىپتەندىك. ءارى جەردى دەمالدىردىق. كەلەسى جىلى اۋا رايى قولايلى بولىپ، سۋ مولشەرى كوبەيسە، وندا ءبىز دە ەگىستىك اۋقىمىن ۇلعايتامىز. شارۋاشىلىقتا 2016 سەرۆيستىك دايىنداۋ ورتالىعى قۇرىلعان. سوعان بايلانىستى ليزينگكە ەكى كومباين، 6 تراكتور بەرىلدى. ديحاندار دالا ءتوسىن دۇبىرگە بولەگەن سول تەحنيكامەن ەگىستىك القاپتاعى كۇرىشتىڭ %90 جيناپ بولدى.

ۆيلوري سوي، اگرونوم:

- گەكتارىنا 30-40 سەنتنەردەن ءونىم الىپ جاتىرمىز. ناقتىسىن ناۋقان اياقتالعاندا ەسەپتەپ شىعارامىز. دەسەك تە 40 سەنتنەردەن كەم بولمايدى دەپ وتىرمىز. اۋدانداعى وننان اسا شارۋاشىلىق كۇرىش ءوسىرۋدى كاسىپ ەتەدى. ولار اتالعان داقىلدى 950 گەكتارعا سەپكەن.

دانيار كاكىموۆ، اۋداندىق اۋىل شارۋاشىلىعى ءبولىمىنىڭ باسشىسى:

- 2021 -جىلى 3 مىڭ تونناعا جۋىق كۇرىش ءونىمىن العانبىز، بيىلعى جوسپار بويىنشا سول 3 مىڭ توننادان اسامىز دەپ وتىر. ورتاشا شىعىم - 30-40 تسەنتنەر. وبلىستا ءداندى- داقىل ەگىلگەن ەگىستىك القاپتاردىڭ تەڭ جارتىسى ورىلدى. ال كارتوپ، كوكونىس جيناۋ ناۋقانى وسى اپتادا اياقتالادى.

www.24.kz