قازاقستان ازاماتى ماجارستاندا زاڭسىز ميگرانتتاردى تاسىمالداعانى ءۇشىن قامالدى

بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتىپ بەردى.

بۇعان دەيىن بۇقارالىق اقپارات قۇرالدارىندا 27 جاستاعى قازاقستاندىق قاناتبەك وتەبەكتىڭ ماجارستاندا جوعالىپ كەتكەنى حابارلانعان بولاتىن.

«بۇل جاعدايدى انىقتادىق. ول ماجارستاندا قاماۋعا الىندى. پوليتسيا ونى ميگرانتتاردى زاڭسىز تاسىمالدادى دەپ ايىپتاپ وتىر. ول وسىدان 1,5 اي بۇرىن قازاقستاندا شەنگەن ۆيزاسىن الىپ، ەۋروپا ەلدەرىنىڭ بىرىنە ۇشىپ كەلگەن. ءبىر اپتادان كەيىن شىعىس ەۋروپا اۋماعىندا، سونىڭ ىشىندە سەربيا، ماجارستان، چەحيادا بولعان جانە وسى باعىت بويىنشا زاڭسىز ميگرانتتاردى تاسىمالداعان. ول ءاۋ باستا- اق قانداي جۇمىسقا بارا جاتقانىن ءبىلدى. بۇل زاڭداعى اۋىر باپ، وتە سالماقتى ايىپ تاعىلىپ وتىر»، - دەدى ايبەك سمادياروۆ جۋرناليستەرگە ارنالعان بريفينگتە.

قازاقستاندىقتىڭ تۇتقىندالۋىنا بايلانىستى سىرتقى ىستەر مينيسترلىگى ەۋروپاعا جۇمىسقا بارۋدى جوسپارلاپ وتىرعان قازاقستاندىقتارعا بەلگىلى ءبىر ەلدىڭ زاڭدارى مەن ەرەجەلەرىن مۇقيات زەردەلەۋدى ەسكەرتتى.

رەسمي وكىلدىڭ ايتۋىنشا، قازىر ق. وتەبەككە ادۆوكات تابىلعان.

«ونىڭ تۋىستارى بارلىق وقيعالار تۋرالى بىلەدى. مەنىڭ ويىمشا، بۇدان ءارى نە بولاتىنىن تەرگەۋ قىزمەتى انىقتايدى» ، - دەدى ا. سمادياروۆ.