اعزاسىن اۋىستىرۋ ءۇشىن تۇركياعا بارعان قازاقستاندىق ايەل قاماۋعا الىندى
بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.
«ءبىزدىڭ ديپلوماتتاردان تۇسكەن اقپارات بويىنشا تۇرىك قۇقىق قورعاۋ ورگاندارى قازاقستان ازاماتىن ۇستاعان. ول تۇركياعا اعزا ترانسپلانتاتسيالاۋ ءۇشىن كەلگەن. الدىن الا مالىمەت بويىنشا، ول جالعان قۇجات جاسادى دەپ ايىپتالىپ وتىر. وقيعانىڭ ءمان-جايىن تەرگەۋ انىقتايدى. ياعني، ول دونوردى تۋىسى رەتىندە كورسەتكەن، ءبىراق دونوردىڭ مۇلدەم باسقا ەلدىڭ ازاماتى بولۋى قۇزىرلى ورگانداردىڭ كۇمانىن تۋدىرعان. سوندىقتان قازاقستاندىق ايەل قازىر قاماۋدا وتىر»، - دەدى ايبەك سمادياروۆ مينيسترلىكتە وتكەن بريفينگتە.
ق ر س ءى م رەسمي وكىلى قازاقستان كونسۋلدىعى اتالعان وقيعانى ەرەكشە باقىلاۋدا ۇستايتىنىن ايتتى.
«ءبىز قازىردىڭ وزىندە ادۆوكات تاپتىق، ونىڭ تۋىستارىمەن ۇنەمى بايلانىستامىز. قازىر ونى دەنساۋلىق جاعدايىنا بايلانىستى ەشقايدا شىقپايتىنى تۋرالى قولحاتپەن اۋىستىرۋدى سۇراپ جاتىرمىز»، - دەدى ايبەك سمادياروۆ.
