شارىن شاتقالىندا ءبىر توپ تۋريست قۇتقارىلدى

«9- قازان كۇنى ساعات 22:05 تە الماتى وبلىسى ت ج د كەزەكشى ءبولىمىنىڭ پۋلتىنە الماتى وبلىسى ۇيعىر اۋدانىندا ورنالاسقان شارىن شاتقالىنىڭ قامال القابىنان 2 شاقىرىم جەردە 7 ادام (5 ەر جانە 2 ايەل) جوعالىپ كەتكەنى تۋرالى حابارلاما ءتۇستى. ولار 8- قازان كۇنى Bicycle Adventure club تۋريستىك اگەنتتىك گيدىنىڭ باسشىلىعىمەن الماتى قالاسىنان كەتكەن. بەلگىلى بولعانداي، تۋريستەر الماتى قالاسىنان شارىن شاتقالىنا تۋريستىك اگەنتتىكتىڭ اۆتوبۋسىمەن بارىپ، ءارى قاراي جاياۋ گيدپەن جولعا شىققان.

وقيعا ورنىنا دەرەۋ قۇتقارۋشىلار جىبەرىلدى.

ىزدەستىرۋ جۇمىستارىنا 100 گە جۋىق ادام جۇمىلدىرىلدى.

ءتۇنى بويى جۇرگىزىلگەن ىزدەۋ ناتيجە بەرمەگەندىكتەن، تاڭەرتەڭ تىكۇشاقتىڭ ۇشۋى جوسپارلانعان بولاتىن.

«10- قازان كۇنى ساعات 08:30 دا جوعالىپ كەتكەن تۋريستەر تابىلىپ، قاۋىپسىز جەرگە ەۆاكۋاتسيالاندى. ولارعا مەديتسينالىق كومەك قاجەت بولمادى»، - دەپ تولىقتىردى اتالعان ۆەدومستۆونىڭ باسپا ءسوز قىزمەتى.

الماتى وبلىسىنىڭ توتەنشە جاعدايلار دەپارتامەنتى ءوزىنىڭ تۋريستىك باعىتتارىن جوسپارلاۋ كەزىندە تومەندە كورسەتىلگەن ەرەجەلەردى ورىنداۋ كەرەكتىگىن ەسكەرتەدى:

1. تۋريستىك مارشرۋتقا شىقپاس بۇرىن مىندەتتى تۇردە الماتى وبلىسى ت ج د ىزدەستىرۋ-قۇتقارۋ بولىمشەسىنە تىركەلىپ، دەپارتامەنت قىزمەتكەرلەرىن كەلەسى ەلەكتروندىق مەكەنجايلار بويىنشا حاباردار ەتىڭىز: edds_dchs_almob@emer.kz, od_dchs_almob@emer.kz، الماتى وبلىسى ت ج د جەدەل-قۇتقارۋ جاساعى كەزەكشىسىنىڭ تەلەفوندارى: 87277250450، 87282221591 جانە 87282223852، سونداي-اق 112. بايلانىس تەلەفوندارى مەن مارشرۋت سىزباسىن كورسەتىڭىز، سونداي-اق كەتۋ جانە كەلۋ كۇندەرىن جانە باسقا دا قاجەتتى اقپاراتتى حابارلاڭىز.

2. قاجەت بولعان جاعدايدا قۇتقارۋشىلاردى شاقىرۋ ءۇشىن ۇيالى بايلانىس ايماعىن ەسكەرە وتىرىپ، مارشرۋتتى جوسپارلاۋ كەرەك.

3. قوزعالىس باستالماس بۇرىن، اۋا رايى جاعدايلارى مەن كەدەرگىلەردىڭ ىقتيمالدىعىن ەسكەرىپ، ىقتيمال قاۋىپتەردى مۇقيات باعالاۋ كەرەك. اۋا رايى ناشارلاعان كەزدە جوعارى كوتەرىلۋدىڭ ورنىنا تومەن ءتۇسىڭىز.

4. ەگەر ءسىز دوستارىڭىزبەن نەمەسە كومپانيامەن ساياحاتتاساڭىز، كوپشىلىكپەن بىرگە بولعانىڭىز ءجون. ءدارى-دارمەكتەردىڭ قاجەتتى قورى بار مەديتسينالىق قوبديشا بولۋى كەرەك.

5. وزىڭىزبەن بىرگە كومپاس الىڭىز.

وسى قاراپايىم ەرەجەلەردى ەستە ساقتاي وتىرىپ، ءسىز توتەنشە جاعدايلاردىڭ الدىن الاسىز.