اتىراۋلىق جىگىت گرانت الىپ، كاليفورنيالىق قۇرت ءوسىرىپ وتىر

اتىراۋ. قازاقپارات - اتىراۋلىق جىگىت گرانت الىپ، كاليفورنيالىق قۇرت ءوسىرىپ وتىر، دەپ حابارلايدى قازاقپارات ءتىلشىسى.

قىزىلقوعا اۋدانىنىڭ ساعىز اۋىلىندا تۇراتىن ءانۋار نۇروۆ بيىل اقپان ايىنان بەرى كاليفورنيالىق قۇرت ءوسىرۋدى قولعا العان. جاقىندا «Demey»ۆولونتەرلىك توپتارعا ارنالعان وبلىستىق كونكۋرسقا «قۇنارلى جەر» تاقىرىبىنداعى جوباسىن ۇسىنىپ، گرانتقا يە بولعان.

«جىل باسىنان بەرى بيولوگيالىق تۇرعىدان زەرتتەلگەن ورگانيكالىق تىڭايتقىش ارقىلى قۇنارلى جەر كولەمىن ارتتىرۋدى كوزدەدىم. وسى ماقساتتا مالدىڭ كوڭىنەن تابيعي تىڭايتقىش ءوندىرۋدى قولعا الدىم. تىڭايتقىشتى باۋ- باقشاعا، تەرەككە پايدالانىپ، جاسىل جەلەكتى كوبەيتۋگە بولادى. اۋىلدا ءۇيىلىپ جاتاتىن مالدىڭ كوڭى جازدا قىزىپ، تۇتىندەپ، قورشاعان ورتانى لاستايدى. ال، ونى وڭدەسەك، ەكولوگيالىق پروبلەمانى شەشىپ، اۋىل تازالىعىنا ۇلەس قوسامىز. سول سەبەپتەن، كاليفورنيالىق قۇرتتى ءوسىرىپ وتىرمىن»، - دەيدى ءانۋار نۇروۆ.

ونىڭ ايتۋىنشا، كاليفورنيالىق قىزىل قۇرتتىڭ ۇزىندىعى - 10 س م، ديامەترى - 3-5 م م، سالماعى شامامەن 1 گرامدى قۇرايدى. ال، ءومىر ءسۇرۋ ۇزاقتىعى - 16 جىل. كادىمگى جاۋىن قۇرتىنا قاراعاندا، 150 ەسە تەز كوبەيەدى. بۇل قۇرتتىڭ جاڭا دەرناسىلى 21 كۇندە پايدا بولىپ، 90-120 كۇندە ۇلكەيەدى. ەكى قۇرتىڭ دەرناسىلى جىلىنا 1,5 مىڭعا دەيىن جەتەدى.

ەسكە سالا كەتەلىك، بۇدان اتىراۋلىق جالبىز بەن جاۋىنقۇرت وسىرۋدەن تابىس تاۋىپ وتىرعانىن حابارلاعان بولاتىنبىز.

اۆتور

بەك مۇستافا