جوعارى ءبىلىم مينيسترلىگى «دالادا تۇنەپ جۇرگەن» ستۋدەنتتەردى ىزدەستىرىپ جاتىر

استانا. قازاقپارات - ق ر عىلىم جانە جوعارى ءبىلىم مينيسترلىگى «دالادا تۇنەپ جۇرگەن» الماتى ستۋدەنتتەرىن ىزدەستىرىپ جاتىر، دەپ حابارلايدى قازاقپارات.

«الەۋمەتتىك جەلىلەردە الماتى ستۋدەنتتەرىنىڭ «دالادا تۇنەپ جۇرگەنى» جايلى ۆيدەو تاراپ جاتىر. عىلىم جانە جوعارى ءبىلىم مينيسترلىگى روليك اۆتورلارىن/قاتىسۋشىلارىن ۆەدومستۆوعا حابارلاسۋدى سۇرايدى. قاجەت بولعان جاعدايدا ول ستۋدەنتتەرگە كومەك كورسەتىلەدى.

ەسكە سالايىق، الماتى قالاسىندا قيىن جاعدايعا تاپ بولعان ستۋدەنتتەردى باسپانامەن قامتاماسىز ەتۋ جونىندەگى جەدەل شتاب جۇمىس ىستەيدى. ستۋدەنتتەر تاۋلىك بويى 77786556083 نومەرىنە حابارلاسا الادى.

ونىمەن ءبىر مەزگىلدە، باسپانادان زاڭسىز شىعارۋ نەمەسە جالعا بەرۋ قۇنىن ءوسىرۋ جاعداي بولسا ازاماتتار تەگىن زاڭگەرلىك كەڭەس الۋ ءۇشىن ادىلەت مينيسترلىگىنىڭ 119 (قالالىق تەلەفون) كولل- ورتالىعىنا نەمەسە 58-00-58 نومەرىنە (الماتى، استانا قالالارى ءۇشىن) حابارلاسا الادى»، - دەلىنگەن مينيسترلىك حابارلاماسىندا.

مينيسترلىك سونداي- اق عىلىم جانە جوعارى ءبىلىم مينيسترلىگىنىڭ 1450 ءبىرىڭعاي بايلانىس ورتالىعى جۇمىس ىستەيتىنىن ەسكە سالدى.

«ەلىمىزدەگى بارلىق جوعارى وقۋ ورىندارىندا قوعامدىق قابىلداۋ كەڭسەلەرى اشىلعان. ول جەرگە ستۋدەنتتەر، ولاردىڭ اتا- انالارى مەن وقىتۋشىلار جۇگىنە الادى»، - دەلىنگەن ۆەدومستۆو اقپاراتىندا.