شىمكەنتتىك جۇرگىزۋشى كولىگىنىڭ ورىندىعىنا ەرتوقىم ورناتىپ الدى

شىمكەنت. قازاقپارات - شىمكەنتتىك جۇرگىزۋشى كولىگىنىڭ ورىندىعىنا ەرتوقىم ورناتىپ، جۇرتتى تاڭقالدىردى، دەپ حابارلايدى قازاقپارات ءتىلشىسى.

الەۋمەتتىك جەلىدە كولىگىنىڭ الدىڭعى ەكى ورىندىعىنا ەرتوقىم ورناتىپ العان جىگىتتىڭ ۆيدەوسى تارادى. «ۆاز-2114» كولىگىنىڭ جۇرگىزۋشىسى ەرتوقىمنىڭ زور اسەرى بارىن ايتادى.

«ارنايى تاپسىرىسپەن ىستەتتىم. ءوزىڭدى اتتا جۇرگەندەي سەزىنەسىڭ. كەرەمەت»، - دەيدى رولدە وتىرعان جۇرگىزۋشى.

ال، ۆيدەونى كورگەندەر تاڭقالىسىپ، ءتۇرلى پىكىر ءبىلدىرىپ جاتىر.

ءبىر وقىرمان «بىردەن تەجەگىش باسۋعا بولمايدى» دەپ كەڭەس بەرسە، ەندى ءبىرى «ەم بولسىن» دەگەن تىلەگىن جەتكىزگەن.

«اۋىلدان شىققانمەن، اۋىل ءالى ودان شىقپاعان»، «گيننەسس رەكوردتار كىتابىنا ەنۋ كەرەك»، «ماشينا اتتىڭ ءجۇرىسىن بەرە المايدى» دەگەن ويلار ايتىلعان.

ال، قىزدار جاعى «يۋبكامەن قالاي وتىرامىز»، «شۇرىق- تەسىك جولمەن جۇرمە» دەپ ازىلدەپ، جازبا قالدىرىپتى.