جەر تەلىمدەرىنە قاتىستى الاياقتىق ءىسى بويىنشا شەنەۋنىك پەن ونىڭ سىبايلاستارى سوتتالدى

قوستاناي. قازاقپارات - قوستاناي اۋداندىق سوتىندا قوستاناي اۋدانى اكىمدىگى جەر قاتىناستارى ءبولىمىنىڭ بۇرىنعى باستىعىنا قاتىستى قىلمىستىق ءىس قارالدى، دەپ حابارلايدى قازاقپارات ءتىلشىسى.

ەركىن سارىمبەت قىزمەت بابىندا جالعان قۇجات جاساعانى ءۇشىن، سونداي- اق ادامدار توبىنىڭ الدىن الا ءسوز بايلاسۋى ارقىلى لاۋازىمدى تۇلعانىڭ قىزمەتتىك بابىن پايدالانا وتىرىپ جاساعان الاياقتىعى ءۇشىن سوتقا تارتىلدى.

ءۇش ايىپتالۋشى وزدەرىنىڭ «قىزمەتتەرى» ءۇشىن جۇزدەگەن مىڭ تەڭگەدەن ميلليونداعان تەڭگەگە دەيىن الىپ، جالپى كەزەكتى اينالىپ وتكىسى كەلەتىندەرگە جەر تەلىمدەرىن بەرۋمەن اينالىسقان.

سوتتىڭ مالىمەتىنشە، 2020 -جىلدىڭ مامىر- ماۋسىم ايلارى ارالىعىندا ە. سارىمبەت پەن جەكە كاسىپكەر ماليكا سارسەنبايەۆا الداۋ جانە سەنىمدى تەرىس پايدالانۋ جولىمەن الدىن الا ءسوز بايلاسۋ ارقىلى ەكى جابىرلەنۋشىگە تيەسىلى جالپى كولەمى 2,4 ميلليون تەڭگەنى (جابىرلەنۋشى ت- نىڭ 3,5 ميلليون جانە ك- ءنىڭ 800 مىڭ تەڭگەسىن) جىمقىرعان.

سارسەنبايەۆا مەن ونىڭ اعاسى ماكيشيەۆ 2021 -جىلدىڭ مامىر ايىندا سوتتالۋشى سارىمبەتتى قىلمىستىق ءىستى توقتاتۋ ءۇشىن لاۋازىمدى ادامعا پارا بەرۋگە كوندىرگەن.

«پروكۋرور ايىپ تاعىلعان مىنا باپتار بويىنشا جازا تاعايىنداۋدى سۇرادى:

سارىمبەتتى 4 جىلعا باس بوستاندىعىنان ايىرۋ، ءومىر بويى مەملەكەتتىك قىزمەتتە جۇمىس ىستەۋگە تىيىم سالۋ، سارسەنبايەۆانى 7 جىلعا باس بوستاندىعىنان ايىرۋ، ماكيشيەۆتى 5 جىلعا باس بوستاندىعىنان ايىرۋ.

سوتتالۋشى سارىمبەت كىناسىن ءىشىنارا مويىندادى، سوتتالۋشىلار سارسەنبايەۆا مەن ماكيشيەۆ كىناسىن مويىندامادى. ناتيجەسىندە، سارىمبەتكە 5 جىل باس بوستاندىعىنان ايىرۋ، سارسەنبايەۆاعا 7 جىل 6 اي باس بوستاندىعىنان ايىرۋ جانە ماكيشيەۆكە 4 جىل باس بوستاندىعىنان ايىرۋ جازاسى تاعايىندالدى»، - دەپ حابارلادى وبلىستىق سوتتان.

جابىرلەنۋشىلەردىڭ ازاماتتىق تالاپتارى ءىشىنارا قاناعاتتاندىرىلدى.