مەكتەپتەردە وتباسىنىڭ تابىسى مەن اتا-اناسىنىڭ نەسيەسى تۋرالى دەرەكتەر جينالمايدى - مينيستر
بۇل تۋرالى وقۋ-اعارتۋ ءمينيسترى اسحات ايماعامبەتوۆ الماتىدا حالىققا ەسەپ بەرۋ كەزدەسۋىندە ايتتى، دەپ حابارلايدى قازاقپارات ءتىلشىسى.
مينيسترمەن كەزدەسۋگە كەلگەن اتا-انالاردىڭ ءبىرى، مەكتەپتەردە وقۋشىلاردىڭ وتباسى تۋرالى دەرەكتەر جينالىپ جاتقانىن ايتتى.
«قازىر مەكتەپتەردە اتا-انالارعا كوپتەگەن ساۋالانامالار تولتىرتىپ جاتىر. مىسالى، جۇمىس ورنى، تابىسى، نەسيەسى، ءۇيى بار ما؟ دەگەن سياقتى قيسىنسىز سۇراقتارعا جاۋاپ بەرۋمىز قانشالىقتى زاڭدى»، - دەپ سۇرادى الماتىلىق.
اسحات ايماعامبەتوۆ بۇل زاڭسىز ەكەنىن اتاپ ءوتتى.
«ءسىز، ناقتى قاي مەكتەپ ەكەنىن ايتىڭىزشى. ءبىز مىندەتتى تۇردە شارا قولدانامىز. ءبىلىم مەكەمەلەرىنىڭ ونداي ساۋال جولداۋىنا قۇقىعى جوق. ياعني، اتا-انانىڭ تابىسى مەن نەسيەسى تۋرالى اقپارات جيناقتالمايدى، سۇراتىلمايدى»، - دەدى اسحات ايماعامبەتوۆ.
