ورتالىق ازياداعى جوعارى ءبىلىم بەرۋ كەڭىستىگىنىڭ بيۋروسى قۇرىلماق

استانا. قازاقپارات - ورتالىق ازياداعى جوعارى ءبىلىم بەرۋ كەڭىستىگىنىڭ بيۋروسى قۇرىلادى.

بۇل شەشىم بۇگىن استانادا بولون پروتسەسىنىڭ باقىلاۋ توبى (BFUG) وكىلدەرىنىڭ قاتىسۋىمەن وتكەن ورتالىق ازيا جوعارى وقۋ ورىندارى رەكتورلارىنىڭ كونفەرەنسياسىندا قابىلداندى.

بۇل تۋرالى قازاقپارات عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

كونفەرەنسيا جۇمىسى ورتالىق ازياداعى ءبىلىم بەرۋ سالاسى بويىنشا وڭىرلىك ىنتىماقتاستىقتى دامىتۋعا باعىتتالعان. وعان قازاقستان، قىرعىزستان، تاجىكستان ءبىلىم مينيسترلىكتەرىنىڭ وكىلدەرى، ورتالىق ازيا ەلدەرىندەگى جوعارى وقۋ ورىندارىنىڭ رەكتورلارى، ەۋروپا كەڭەسى، Quacquarelli Symonds (QS) ، UNESCO، BFUG جانە لاتۆيانىڭ اكادەميالىق اقپاراتتىق ورتالىعى سياقتى حالىقارالىق ۇيىمداردىڭ وكىلدەرى قاتىستى.

كونفەرەنسياعا قاتىسۋشىلار ورتالىق ازياداعى جوعارى ءبىلىم بەرۋ كەڭىستىگىنىڭ بيۋروسىن قۇرۋ تۋرالى بىرلەسكەن شەشىم قابىلدادى. ونىڭ قۇرامىنا ءار ەلدىڭ وكىلى كىرە وتىرىپ، تەپە-تەڭدىك شارتتارىندا ارەكەت ەتەدى. بيۋرونىڭ ميسسياسى - ايماقتاعى بولون رەفورمالارىن ىلگەرىلەتۋ ارقىلى ورتالىق ازيا ەلدەرىندەگى جوعارى ءبىلىمنىڭ تارتىمدىلىعىن ارتتىرۋ. جاڭا ورگان عىلىم جانە جوعارى ءبىلىم مينيسترلىگىنىڭ بولون پروتسەسى جانە اكادەميالىق ۇتقىرلىق ورتالىعىندا ورنالاسادى.

كونفەرەنسيانىڭ پلەنارلىق وتىرىسىن ق ر عىلىم جانە جوعارى ءبىلىم ءمينيسترى ساياسات نۇربەك اشتى. ول ورتالىق ازياداعى جوعارى ءبىلىم بەرۋ كەڭىستىگىن قۇرۋدىڭ نەگىزدەرى ەۋروپالىق وداق پەن ورتالىق ازيانىڭ ءبىلىم مينيسترلەرىنىڭ كەزدەسۋلەرىندە جانە باسقا دا بىرلەسكەن جوبالاردا قالانعانىن اتاپ ءوتتى.

«ءبىز ورتالىق ازياداعى جوعارى ءبىلىم بەرۋ كەڭىستىگىن ستۋدەنتتەر مەن جوعارى وقۋ ورىندارىنىڭ اكادەميالىق قۇرامى وقۋ، ءبىلىم، تاجىريبە الماسۋ، زەرتتەۋلەرگە قاتىسۋ ءۇشىن كەدەرگىسىز قوزعالا الاتىن ەركىن ايماق رەتىندە كورەمىز. بيىل قازاقستان شەتەلدىك ازاماتتارعا ارنالعان ستيپەنديالىق باعدارلاما شەڭبەرىندە ورتالىق ازيا ءبىلىم بەرۋ كەڭىستىگىنە كىرگەن ەلدەردىڭ ازاماتتارىنا 186 گرانت ءبولدى»، - دەپ اتاپ ءوتتى ساياسات نۇربەك.

ايتا كەتسەك، 2021-جىلى قازاقستان، قىرعىزستان، تاجىكستان، وزبەكستان جانە تۇرىكمەنستان ورتالىق ازياداعى جوعارى ءبىلىم بەرۋ كەڭىستىگىنىڭ نەگىزگى قاعيداتتارى تۋرالى تۇركىستان دەكلاراتسياسىن قابىلدادى. ال، بيىل مامىر ايىندا الماتىدا ورتالىق ازيا رەكتورلارىنىڭ فورۋمى ءوتىپ، ورتالىق ازيا ۋنيۆەرسيتەتتەرىنىڭ قاۋىمداستىعىن قۇرۋ تۋرالى شەشىم قابىلداندى.