تازى مەن توبەتتى ساقتاۋ جانە قالپىنا كەلتىرۋ ماسەلەلەرى بويىنشا بولەك زاڭ ازىرلەنەدى

استانا. قازاقپارات – ق ر پرەزيدەنتىنىڭ ءىس باسقارۋشىسى ايبەك دادەبايەۆ قازاقى ءيت تۇقىمدارى تازى مەن توبەتتى ساقتاۋ جانە قالپىنا كەلتىرۋ ماسەلەلەرى بويىنشا كەزەكتى جيىن وتكىزدى. بۇل تۋرالى قازاقپارات ق ر پ ءى ب باسپا ءسوز قىزمەتى.

كەزدەسۋدە مينيسترلىكتەردىڭ باسشىلىق وكىلدەرى ءبىر اي ىشىندە اتقارىلعان جۇمىس بارىسى تۋرالى باياندادى، سونداي-اق جوسپارلانعان ءىس-شارالارعا توقتالدى. ساراپشىلارمەن (كينولوگتار، عالىمدار) تالقىلاۋ ناتيجەسىندە تازى مەن توبەتتى ساقتاۋ جانە قالپىنا كەلتىرۋ ماسەلەلەرىنە قاتىستى جەكە زاڭ جوباسىن ازىرلەۋ جونىندە شەشىم قابىلدانعانى ايتىلدى.

وسىعان وراي، جيىن قورىتىندىسى بويىنشا ق ر ەكولوگيا، گەولوگيا جانە تابيعي رەسۋرستار مينيسترلىگىنە (قارالىپ وتىرعان ماسەلە بويىنشا وكىلەتتى ورگان) باسقا مۇددەلى مەملەكەتتىك ورگاندارمەن بىرلەسە وتىرىپ زاڭ جوباسىنىڭ سوڭعى نۇسقاسىن ەنگىزۋ تاپسىرىلدى. بۇل قۇجاتتى ازىرلەۋگە ق ر پرەزيدەنتىنىڭ ءىس باسقارماسى جانىنداعى پارلامەنتاريزم ينستيتۋتى ۇسىنىس بەرگەنىن ايتا كەتكەن ءجون.

سونىمەن قاتار ق ر ەكولوگيا، گەولوگيا جانە تابيعي رەسۋرستار مينيسترلىگى اۋىل شارۋاشىلىعى مينيسترلىگىمەن جانە ساراپشىلارمەن بىرلەسىپ قازاقى ءيت تۇقىمدارى ستاندارتىنىڭ جاڭا جوباسىن قاراستىراتىن بولدى.

«الدا اتقارىلاتىن ءىس از ەمەس. ۆەدومستۆوارالىق جۇمىس توبىنىڭ بارلىق شەشىمدەرى ساراپشىلارمەن بىرگە تالقىلانىپ، ولاردىڭ پىكىرى ەسكەرىلۋگە ءتيىس. كەزىندە پاناجايى بار كينولوگيالىق زەرتتەۋ ورتالىعىن سالۋ تاپسىرىلعان ەدى، ول ورتا جولدان توقتاپ قالدى. ەندى مۇنى سوڭىنا دەيىن جەتكىزۋ كەرەك. سونىمەن قاتار، تازى مەن توبەتتى حالىقارالىق كينولوگيالىق قاۋىمداستىقتا (FCI) تىركەتىپ، ولاردىڭ شىققان جەرى رەتىندە قازاقستاندى كورسەتۋ راسىمدەرىن ەرەكشە باقىلاۋعا الۋ قاجەت»، - دەدى ق ر پرەزيدەنتىنىڭ ءىس باسقارۋشىسى ايبەك دادەبايەۆ.