سولتۇستىك كورەيا تاعى دا بالليستيكالىق زىمىراندار ۇشىردى
ك ح د ر س ءى م مالىمدەگەندەي، پحەنيان ا ق ش پەن ونىڭ وداقتاستارىنىڭ كورەي تۇبەگى ايماعىنداعى ارەكەتتەرىنە بايلانىستى ءوز قاۋىپسىزدىگىن قامتاماسىز ەتۋ ءۇشىن قاجەتتى شارالاردى قابىلداپ جاتىر، دەپ حابارلايدى قازاقپارات euronews كە سىلتەمە جاساپ.
سوڭعى كۇندەرى سولتۇستىك كورەيانىڭ زىمىران ۇشىرۋىنان كەيىن ايماقتاعى جاعداي ۋشىعىپ كەتتى. ب ۇ ۇ قاۋىپسىزدىك كەڭەسىنىڭ شۇعىل وتىرىسىندا ا ق ش- تىڭ تۇراقتى وكىلى ليندا توماس-گرينفيلد پحەنيانعا قاتىستى سانكسيا رەجيمىن كۇشەيتۋگە شاقىردى.
«ءبىز ب ۇ ۇ- عا مۇشە بارلىق مەملەكەتتى، اسىرەسە قاۋىپسىزدىك كەڭەسىنىڭ مۇشەلەرىن اقىلعا سىيمايتىن وسى ارەكەتتى ايىپتاۋعا قوسىلۋعا جانە ك ح د ر- دى ءوزىنىڭ زاڭسىز قارۋ-جاراق باعدارلامالارىنان تولىق، تەكسەرىلەتىن جانە قايتىمسىز تۇردە باس تارتۋعا، سونداي-اق يادرولىق قارۋسىزداندىرۋ باعىتىندا ديپلوماتيانى قولدانۋعا شاقىرامىز»، - دەدى ب ۇ ۇ جانىنداعى ا ق ش- تىڭ تۇراقتى وكىلى ليندا توماس-گرينفيلد.
سوعان قاراماستان قاۋىپسىزدىك كەڭەسىنىڭ وتىرىسى ناتيجەسىز اياقتالدى. رەسەي مەن قىتاي ا ق ش- تىڭ مالىمدەمەسىنە جاۋاپ رەتىندە ۆاشينگتوندى ايماقتاعى تەكەتىرەستى كۇشەيتپەي، كەرىسىنشە بىتىمگەرشىلىك جولىنا تۇسۋگە شاقىردى.
بۇعان دەيىن حابارلانعانداي، سوڭعى 5 جىل ىشىندە العاش رەت 4 - قازان كۇنى سولتۇستىك كورەيا جاپونيا اۋماعى ۇستىنەن بالليستيكالىق زىمىران ۇشىردى. جاپونيا بيلىگى سولتۇستىك-شىعىس ايماقتاردىڭ تۇرعىندارىن ۋاقىتشا ەۆاكۋاتسيالاۋعا جانە پويىزداردىڭ جۇمىسىن توقتاتۋعا ءماجبۇر بولدى.
«ك ح د ر- ءدىڭ بالليستيكالىق زىمىراندارىن ۇشىرۋى ايماقتاعى تۇراقسىزدىقتىڭ وسۋىنە اكەلۋى مۇمكىن»، - دەپ اتاپ ءوتتى ب ۇ ۇ قاۋىپسىزدىك كەڭەسىنىڭ وتىرىسىندا ب ۇ ۇ باس حاتشىسىنىڭ تاياۋ شىعىس، ازيا جانە تىنىق مۇحيتى بويىنشا كومەكشىسى حالەد حياري.
