سەنىڭ ارقاڭ. ديماش قۇدايبەرگەننىڭ ۆەتنامدىق جانكۇيەرلەرى قازاق تىلىندە سويلەدى

استانا. قازاقپارات – ءانشى ديماش قۇدايبەرگەننىڭ كونسەرتىندە ۆەتنامدىق جانكۇيەرلەرى قازاقشا سويلەدى.

بۇل تۋرالى ول Instagram-پاراقشاسىندا ءبولىستى.

«قازاق تىلىنە قۇرمەت كورسەتىپ جۇرگەن الەمدەگى بارلىق جانكۇيەرىمە ەرەكشە العىس ايتامىن»، - دەپ جازدى ءانشى.

«بارلىعىڭا سالەم! ءبىز ۆەتنامنان كەلدىك. سەن دە ءبىر كۇنى كونسەرتىڭدى ۆەتنامدا وتكىزەسىڭ دەگەن ۇمىتتەمىز. راقمەت. ءبىز سەنى قاتتى جاقسى كورەمىز»، - دەدى جانكۇيەرلەرىنىڭ ءبىرى.

كەيىن ۆەتنامدىق Dears-تىڭ ءبىرى ديماشتىڭ ارقاسىندا قازاق ءتىلىن ۇيرەنگەنىن جانە باسقا دا ۆەتنامدىقتارعا ۇيرەتىپ جۇرگەنىن ايتتى.

«سالەمەتسىز بە! ءبىز ۆەتنامنان ارنايى كەلدىك. مەن ديماشتىڭ ارقاسىندا قازاق ءتىلىن وقىعىم كەلدى. ۆەتنامدىقتار قازاق ءتىلىن بىلمەگەندىكتەن، ماعان قازاق ءتىلىن وقۋ قيىنعا سوقتى. قازىر مەن باسقا ۆەتنامدىقتارعا قازاق ءتىلىن ۇيرەتىپ ءجۇرمىن»، - دەدى ول.

جەلى قولدانۋشىلارى قازاقشا سويلەگەن جانكۇيەرگە ءسۇيسىنىپ، ءتۇرلى پىكىر قالدىرعان. ءتىپتى پىكىرگە وزگە دە جانكۇيەرلەر قازاق ءتىلىن ۇيرەنگىسى كەلەتىنىن جازعان.

«تەك سەنىڭ ارقاڭدا مەن قازاق جانە ورىس تىلدەرىن وقىپ جاتىرمىن»، «ۇلگى بولارلىقتاي ەكەن»، «ديماش، سەن قازاقشا سويلەگەن سايىن ءبارى ۇيرەنگىسى كەلەدى. سەنىڭ ارقاڭ»، «مەن دە قازاق ءتىلىن ۇيرەنگىم كەلەدى. مەن دە ءبارىن تۇسىنگىم كەلەدى»، - دەپ جازعان جەلى قولدانۋشىلارى.