بەيبىت سارىباي. سيلۋەت - اڭگىمە

استانا. قازاقپارات - قازاقستان جازۋشىلار وداعىنىڭ مۇشەسى ءارى ادەبي قىزمەتكەرى، جازۋشى، ساتيريك بەيبىت سارىبايدىڭ رەسمي پاراقشاسىندا ءومىردىڭ ءارقيلى قىرلارى جازىلىپ وتىرادى.

بۇل جاس جازۋشىنىڭ بۇرىنىراقتا جازعان شىعارماسى ەدى. سونى وقىرماندارعا ۇسىنىپ وتىرمىز.

سيلۋەت
- شەشىنىڭىز، - دەدىم.

ول بەتىمە قاراپ ءۇنسىز تۇرىپ قالدى. قاپەلىمدە اۋزىنا ءسوز تۇسەر ەمەس. سالدەن كەيىن عانا ەسىن جيعانداي بولىپ:

- كەلمەي جاتىپ سىزدىكى قىزىق ەكەن... ەنتىگىمىزدى باسىپ الساق بولار ەدى. الدە اقشاڭ تولەنگەن دەپ باسىنىپ تۇرسىز با؟ - دەپ، بەتىمە تىكتەپ قارادى.

- كەشىرەرسىڭ، مەن ءسال اسىعىستىق جاساپپىن. بولمەنىڭ ەسىگىن كىلتتەمەپتىم دە عوي. مۇمكىن كوفە ىشىپ ءشولىمىزدى باسىپ الارمىز. سودان كەيىن اسىقپاي كىرىسەرمىز...

- العاش رەت بولعان سوڭ با، ءوزىمدى جايسىز سەزىنىپ تۇرمىن. ءبىر بىرىمىزگە ەتىمىزدى ۇيرەتىپ الساق جارار ەدى.

- ايتقانىڭ بولسىن. الايدا، سەن مەنىڭ الدىمدا مۇنشالىقتى قىسىلاسىڭ، بۇكىل ءبىر توپقا ورتاق بولىپ كەلسەڭ، مۇلدە قينالىپ قالعانداي ەكەنسىڭ. ونىڭ ۇستىنە ءبىز توپقا ورتاق قىلىپ العان قىزدارمەن اۋديتوريادا-اق جۇمىس جاساي بەرەمىز. ال جاتاقحانادا ەكەۋمىز عانامىز. كىمنەن قىسىلاسىڭ؟

***

بالا كۇنىمنەن ارمانىم بولعان سۋرەتشىلىك ونەردى شىنداپ قولعا العان كەزىم ەدى. ۋنيۆەرسيتەتتىڭ سۋرەتشى-ديزاينەر فاكۋلتەتىنىڭ 3-كۋرسىندا وقيتىن مەن ءۇشىن قىزداردىڭ جالاڭاش ءتانىن كورۋ سونشالىقتى تاڭسىق ەمەس. العاشقى كۋرستاردا اسەرى بولعانى راس. كەيىن كەلە بارلىعىمىزدىڭ دا ەتىمىز ءولىپ كەتكەن. ەڭ بىرىنشىسىندە قىزىق بولعان. ءوزىمىزدى الدەقاشان كلاسسيكتەردىڭ قاتارىنا قوسىپ قويعان ءبىر توپ ستۋدەنت بەس قارۋىمىزدى سايلاپ الىپ وتىرعانبىز. مۇعالىمىمىز بۇگىنگى كۇنى ناتۋرشيتسامەن جۇمىس ىستەيتىنىمىزدى ەسكەرتكەن. ءبىراز ۋاقىت وتكەننەن كەيىن ۇستازىمىز تالدىرماش بويلى ادەمى قىزدى ەرتىپ كەلدى دە، بىزدەن:

- دايىنسىڭدار ما؟ - دەپ سۇرادى. ءبىز ءبىراۋىزدان دايىن ەكەنىمىزدى جەتكىزدىك.

- ال، وندا ىسكە كىرىسىڭدەر. ۇلگەرمەي قالۋلارىڭ مۇمكىن. ءبىر ساعاتقا عانا الدىم، - دەدى دە، قىزعا قاراپ: - باستاي بەرىڭدەر، - دەپ ەسكەرتتى. ناتۋرشيتسامىز بىزدەن بۇرىن دا تالاي سۋرەتشىمەن جۇمىس ىستەگەن بولسا كەرەك، ەش قىسىلماستان ۇستىندەگى بار كيىمىن سىپىرىپ تاستادى دا، لىپاسىز تۇرعان قالپىندا:

- سىزدەرگە قالاي وتىرعانىم ىڭعايلى؟ - دەدى.

ءبىز سول كەزدە عانا ەسىمىزدى جيىپ، ءبىر اۋىزدان «بىزگە ءبارىبىر» دەپ شۋلاپ سالا بەردىك. تىسقاققان قىز ءبىزدىڭ باقىرايعان كوزىمىزگە قاراپ ءبىر كۇلىپ الدى دا ورنىنا جايعاستى.

مىنە، سول العاشقى ناتۋرشيتسادان بەرى نەشەمە قىزدىڭ جالاڭاش ءتانىن سۋرەتتەدىك. ءبىر عانا قىزدى قاتار وتىرعان التى بىردەي سۋرەتشى كەسكىندەيمىز. ارينە ارقايسىمىزدىكى ءارتۇرلى بولىپ شىعىپ جاتادى. الايدا، ماقتانعانىم ەمەس، سولاردىڭ ءبىر دە بىرەۋى مەنەن اسىرىپ اسپەتتەي الماعان شىعار. باسقا جانرلاردا جاقسى جازا الماسام دا الدىما ايەل كەلگەندە شابىتىم قوزىپ، قالامىم وزىپ سالا بەرەدى.

ونىڭ ۇستىنە ءوزىمنىڭ ءسۇيىپ تاڭداپ العان جانرىمنىڭ ءوزى دە پورترەت جانرى ەدى. كەيىن كەلە داڭقتى باتىرلار، ۇلت ۇرانىنا اينالعان قازاقتىڭ بىرتۋار ۇلدارى مەن قىزدارىنىڭ پورترەتىن جاساۋمەن اينالىسىپ، كوپ ۋاقىتىمدى سوعان ارناپ جۇرگەم. ايتسە دە مەنىڭ ەڭ جاقسى شىعارمام ايەل تاقىرىبىنا ارنالعان دۇنيە سياقتانادى دا تۇرادى.

سول ەڭ ۇلى تۋىندىمدى جازامىن دەپ قانشاما كەيىپكەر اۋىستىردىم ەكەن. ءومىردىڭ بار قىزىعىنان باز كەشتىم دەپ ايتپاي-اق قويايىن. ءبىراق، مەن ءۇشىن ءومىردىڭ ەڭ ءبىر ماعىنالى دا ءماندى كەزدەرى سول ۇلى كەيىپكەرىم مەن ۇلكەن تۋىندىمدى ىزدەپ، ادەمى ايەلدەردىڭ ءتانىن سىزبالاپ وتىرعان ساتتەرىم ەكەنىن ايتسام: بىرەۋ سەنىپ، بىرەۋ سەنبەس. مەنىڭ قانداي دا ءبىر مەرەكەنى جاقسى وتكىزۋىم ءۇشىن، مەرەكەنى مەرەكە دەپ سەزىنۋىم ءۇشىن وسىلاي سۋرەت سالىپ وتىرۋىم كەرەك ەدى. ءبىراق مەن كۇتكەن كەيىپكەر دە تابىلماي، ۇلكەن تۋىندىم دا جازىلماي، تالاي اۋرە-سارساڭعا ءتۇستىم. كۋرستاس دوستارىم مەيرامحانالار مەن تۇنگى كلۋبتاردى جاعالاپ كەتكەن تۇندەردىڭ بارلىعىندا دا مەن بار قارجىما ناتۋرشيتسا جالداپ الىپ، تابيعات سۇلۋلىقتى كەسكىندەۋمەن وتىراتىنمىن.

بۇگىن دە سول ويمەن ۇلكەن دۇنيەم جازىلار ما ەكەن دەگەن ۇمىتپەن مىنا قىزدى الىپ كەلگەنمىن. كەلە سالىسىممەن اسىعىستىق جاساپ، «شەشىنىڭىز» دەپ شوشىتىپ العانىم دا سول. قۇشتارلىعىم شىداتپاي بارا جاتسا قايتەيىن.

ول كوفە ىشىپ ءۇنسىز وتىر. مەن اساي- مۇسەيىمدى دايىنداپ الىپ، ءوز ورىندىعىما وتىردىم. قىزدىڭ ورنىن دا جاقسىلاپ جاساپ قويعانمىن. شىعارما كومپوزيتسياسىنا لايىقتاپ جاسالعان بۇرىشتىڭ وزىنە ارنالعانىن قىز كىرگەن بەتتە-اق سەزگەن. بايقاۋىمشا، سول جەرگە وتىرۋعا جۇرەكسىنەتىن سياقتى. ءتىپتى باتىلى بارماي ءبىراز ۋاقىت تۇردى. ءشولى قانسا دا كوفەنى قايتا- قايتا سىمىرە بەردى. بار ماقساتى ۋاقىتتى سوزا تۇسپەك. وعان مەنىڭ شىدامىم جەتەر ەمەس.

- شەشىنىڭىز، - دەدىم.

ول ءوز ورنىنا كەلدى دە بىرتىندەپ شەشىنە باستادى. ءبىرىنشى ۇستىندەگى جەڭىل كوفتاسىن شەشىپ، قاسىندا تۇرعان ورىندىقتىڭ ارقالىعىنا ىلدى. تاعى دا ءبىراز ۋاقىت قيمىلسىز تۇرىپ قالدى.

- مەن ءسىزدى كۇتىپ وتىرمىن.

قوڭىر بارقىت شالبارىن شەشتى. شالبارىنىڭ ىشىنەن جۇقالتاڭ كالگوتكى كيگەن ەكەن. بەتىمە ءبىر قاراپ، كالگوتكىسىنە ءبىر قاراپ ءۇنسىز وتىر.

- ونى دا شەشىڭىز.

شەشتى. وسى وتىرىسىندا قۇددى ءبىر اش قاسقىردىڭ الدىندا وتىرعان بەيكۇنا كوجەك سىندى ەدى. تاعدىر جازدى، مەن كوندىم دەگەندەي اقىر سوڭىندا لىپاسىز قالدى. سول كەزدە عانا مەن ونىڭ جانىنا باردىم دا قالاي وتىرۋ كەرەك ەكەندىگىن كورسەتىپ بەرىپ، ءوز ورنىما كەلىپ جايعاستىم. قوزعالۋعا بولمايتىندىعىن ەسكەرتتىم. ءوزىم بولسام ۇزاق جولدان، ساحارادان شولدەپ كەلىپ، سۋسىنعا باس قويعان جولاۋشىداي ءوز ىسىمە قۇنىعا كىرىستىم.

ءيا، بۇل قىز مەن ويلاعانداي بولىپ شىقتى. مەن بۇل پەرىشتەنى العاش رەت باس كورپۋستىڭ ءۇشىنشى قاباتىنان كەزدەستىرگەنمىن. كوكتەمنىڭ جازعا ۇلاسار مامىراجاي شاعىندا كورگەنمىن. ابيتۋرەنتتەردىڭ كەلە باستاعان كەزى ەدى. ساباعىن ونشا مەنسىنىڭكىرەي بەرمەيتىن ءبىر اكادەميك شال بولعان. سول شالدىڭ كەسىرىنەن سوڭعى سىناقتان ەكى الىپ قالىپ، سونىڭ اۋرەسىمەن جۇرگەنمىن. كۋرستاستارىمنىڭ بارلىعى دا اۋىلدارىنا الدەقاشان اتتانىپ كەتكەن- تۇعىن. مەن سول اكادەميك اتامدى ىزدەپ كەلىپ، كافەدرانىڭ الدىندا تۇرعاندا كورگەم وسى سۇلۋلىقتى. جەڭىل باسىپ بارا جاتقان قىزدىڭ سوڭىنان قالاي ەرىپ كەتكەنىمدى ءوزىم دە بايقاماي قالدىم. اياق باسىسىنا دەيىن تارتىپ بارادى. قولىندا كىشكەنتاي سومكەشە مەن كىتاپتار بار. ەمتيحانعا دايىندىعى جامان ەمەس دەپ ءتۇيدىم. مىنەزىنەن حابارىم جوق. دەگەنمەن تال بويىنان تارىداي ءمىن تابىلماسى بەلگىلى. اللاتاعالانىڭ شەبەرلىگىنە تاڭدانباسقا شاراڭ قايسى. ءوز قالاعانىن ءمىنسىز قىلىپ جاراتا الاتىن جاراتۋشى يەنىڭ ارمانى جوق-اۋ. ءتاڭىرىمىزدىڭ جاقسى كۇنى جاراتقان سۇلۋلىعىن تاماشالاپ ەسىم كەتكەنى سونشالىق، اكادەميك اقساقالدى دا، ونىڭ ساباعىنان بۇگىن سوڭعى مۇمكىندىك بەرىلگەن سىناعىن دا ۇمىت كەتكەندەي ەدىم. مەنىڭ قيالىمداعى پەرىشتەنىڭ جەر بەتىندەگى بەينەسى جولدىڭ قارسى بەتىندەگى ساياباقتاعى بوس ساكىلەردىڭ بىرىنە بارىپ جايعاستى. مەن ونىڭ قاسىنا بارىپ وتىردىم دا قالتامنان شىلىم الىپ تۇتاتتىم. ال، ونىڭ كىتاپقا بەرىلگەنى سونشالىق، ماعان مۇلدە نازار اۋدارار ەمەس. قاجەت قىلماسىن ءبىلدىم دە، ونسىز دا از قادىرىمدى جوعالتپايىن دەپ كەتىپ قالدىم. ىشتەي ءبىر ءۇمىتتىڭ جەتەگىندە ءجۇردىم. ول قىزدىڭ مىناداي دايىندىعى دالادا قالدىرماس. قايتسە دە وسى ۋنيۆەرسيتەتكە تۇسەدى دەپ سەندىم. ال، بۇل ۋنيۆەرسيتەتكە كەلسە بولعانى، قالعانىن كورە جاتارمىز دەگەم دە قويعام.

ءۇمىتىم الداماپتى. كۇز كەلىسىمەن مەن بۇل قىزدى ىشتەي ىزدەي باستاعانمىن. اقىرى فيلوسوفيا فاكۋلتەتىنىڭ ستۋدەنتى بولعانىنا كوز جەتكىزدىم. الايدا، وتكەن عاسىردىڭ جەتپىسىنشى جىلدارىنداعى ەسكى مودامەن كيىنەتىن، قالاداعى قاپتاعان شاشتارازدارعا جىلىنا ەكى-اق مارتە باس سۇعاتىن سابالاق شاشتى ماعان قارايتىنداي سىڭاي تانىتپاعاسىن ءۇمىت ۇزگەنمىن.

مەن وعان عاشىق ەمەس ەدىم. ءسوز ايتىپ مازاسىن السام دەگەن دە ويىم جوق. تەك كوپ اڭساعان، زارىعا كۇتكەن كەيىپكەرىمنىڭ پروتوتيپىن تاپقانداي عالامات ءبىر اسەردە جۇرگەنمىن. بىراق اۋىلدان كەلگەن، تاڭ تازالىعىنداي مولدىرلىگىن جوعالتپاعان بوتاناكوزگە مەنىڭ الدىما كەلىپ جالاڭاش وتىرشى، مەن سەنىڭ سۋرەتىڭدى سالايىن دەپ قايتىپ ايتپاقپىن. باتىلىم بارماعان.

قۇداي ءساتىن سالسا تەز-اق ەكەن. كەزەكتى بىر ساباق بارىسىندا تاعى دا ناتۋرشيتسامەن جۇمىس ىستەۋىمىز كەرەك ەدى. ۇستازىمىز نىسانالىققا تۇراتىن سۇلۋىمىزدى ەرتىپ كەلگەن. باستاپقىدا قارىنداش ۇشتاپ وتىرىپ اڭعارماپتىم. ءبىر كەزدە باسىمدى كوتەرىپ قاراعانىم سول ەدى, ەسىمنەن تانىپ قالا جازدادىم. مىناۋ سول عوي... سول قىز عوي، قۇداي-اۋ. ءيا، سونىڭ ءدال ءوزى. ەگەر شىنىمەن ول بولسا، بۇل جەردە نە قىپ ءجۇر. ءبىر كۇش مەنى ورنىمنان تۇرعىزىپ جىبەردى.

- بۇگىنشە ناتۋرشيتسامەن جۇمىس ىستەمەي-اق قويايىق. بۇل مەنىڭ قارىنداسىم، - دەدىم دە ونى سىرتقا ەرتىپ شىعىپ كەتتىم. ونسىز دا ەسى كىرەسىلى-شىعاسىلى بولىپ تۇرعان قىز اڭ- تاڭ قالپىندا ماعان ەرىپ شىقتى. سىرتقا ەرتىپ شىعىپ بارا جاتقاندا بۇل قىزدى الىپ كەلگەن ۇستازىم:

- كەشىر، مەن بىلمەدىم. بۇل قىزدىڭ اقشاسى تولەنىپ قويعان ەدى،- دەدى.

ءارتۇرلى تاپسىرىستار ورىنداپ جۇرەتىندىكتەن قالتام قۇرعامايتىن. كوكتەن ىزدەگەنىمدى جەردەن تاۋىپ بەرگەن كوكەمە كەرەگىن ۇستاتىپ جۇرە بەردىم.

ءيا، ءبىز ناتۋرشيتسالارعا قوماقتى قارجى تولەيتىنبىز. ءبىر ساعاتتاي الدىڭدا جالاڭاش وتىرىپ بەرگەنى ءۇشىن جاس مۇعالىمنىڭ ءبىر ايلىعى كولەمىندە اقشا الادى. ارينە ولار ءۇشىن دە كوپ ەركەكتىڭ ورتاسىندا جالاڭاش وتىرۋ وڭاي ەمەس. ءبىراق، بۇل ونەر عوي. ونىڭ ۇستىنە سۋرەتشىلەر جابايى ەمەس. بارىنە دە سالقىنقاندىلىقپەن قاراپ ۇيرەنگەن. مىنا بەيشارا قىز دا امالسىز كەلگەن ەكەن. سىرتقا شىققاننان كەيىن ءبىراز جەر ءۇنسىز كەلە جاتتى دا:

- ءسىز جامان ويلاپ قالعان شىعارسىز، - دەدى.

- بىزدەر جامان ويلاي المايمىز.

- اقشا كەرەك بولعان سوڭ كەلىپ ەدىم.

- اقشا ەلدىڭ بارىنە قاجەت. ەشكىم ەرىككەنىنەن ەمەس، ءبارى اقشا تابۋ ءۇشىن كەلەدى بۇل جەرگە.

- جوق، ماعان اياق استىنان قاجەتتىلىك تۋىندادى... تەز ارادا تابۋ كەرەك بولعان سوڭ... قۇربىلارىمنىڭ ەشقايسىسى ماعان كومەكتەسەتىندەي كۇيدە ەمەس ەدى. جالعىز جول وسى بولدى، - دەپ ءۇزىپ-جۇلقىپ بىرنارسە دەگەندەي بولدى.

ءوزىنىڭ ايتىسىنا قاراعاندا بۇل قىزدىڭ ساباق ۇلگەرىمى جاقسى بولعان. ءبىلىمى مەن بىلىگىنە دەگەن سول سەنىمنىڭ جەتەگىمەن قىسقى سەسسيادان قينالماي وتەمىن دەپ جۇرگەن. ساقتىق جاساپ وزگە كۋرستاستارىنشا سىناققا بەرەمىن دەپ اۋىلدان اقشا سۇراتپاعان. سۇراتقان كۇندە دە شالعايداعى اكە مەن شەشەنىڭ جاعدايى بەلگىلى ەدى. سولاردى قيناعىسى كەلمەگەن. ايتپەسە جوعارعى كۋرستاعىلار «باسقا ساباقتاردان ءوز كۇشتەرىڭمەن الساڭدار دا ەسىمجان قاسىمجانوۆتىڭ ساباعىنان الا المايسىڭدار. سوعان بەرەسەلەرىڭ قالتالارىڭدا ءجۇرسىن» دەپ ەسكەرتۋىن ەسكەرتكەن. سويتكەن ەسىمجان اعاسى بۇل قىزدى قايداعى جوق سۇراقتاردى قويىپ ءسۇرىندىرىپتى. تىعىرىقتان شىعار جول وسى دەپ ۇلكەن كۋرستارداعى ءبىر قىز بىزگە جول سىلتەپ جىبەرىپتى. باستاپقىدا باس تارتقانىمەن تاجىريبەلى قىزدىڭ: «بىلتىر ءدال سەن قۇساپ قينالعاندا مەن دە بارعانمىن. ولاردان قورىقپا، ولار ونەر ادامدارى. سەنى جەمەيدى. تەك سۋرەتىڭدى سالادى، بولدى. ۇيالاتىنداي تۇك تە جوق» دەپ ۇگىتتەپ، كوندىرىپ الىپ كەلگەن ەكەن.

سودان بەرى دوسپىز. قينالعان كەزدەرىندە كەلىپ تۇرادى. مەن كومەگىمدى اياعان ەمەسپىن. تاعى ءبىر جولى كومەك سۇراي كەلگەندە:

- مەن سىزگە قارىزدار بولدىم-اۋ، - دەگەن. مەن سول كەزدە جايلاپ قانا:

- كوڭىلىمنىڭ حوشى بولعاندا شاقىرامىن. سول كەزدە ءسوزىمدى جەرگە تاستاماساڭ بولعانى، - دەپ جايلاپ قانا قۇلاققاعىس جاساعانمىن. قىز ءۇنسىز كەلىسىمىن بەرگەن. وسى ءبىر كوزىمەن بەرگەن ۋاعداسىنان كەيىن ۇلكەن دايىندىقتا جۇرگەن ەدىم. سونىڭ رەتى بۇگىن كەلدى. مەن ونى شاقىردىم. باستاپقىدا قولىنىڭ بوسامايتىندىعىن ايتىپ، باسقا كۇنگە ىسىرعىسى كەلگەنىمەن، ۋادەمىز بويىنشا كەلەتىن بولىپ شەشتى.

ەندى مىنە الدىما وتىرعىزىپ قويىپ، ءمارمار كەيپىن اق قاعازعا كوشىرۋ ۇستىندەمىن. ءتورت ساعات بويى قوزعالماي وتىرىپ بەردى. ءجۇمىسىم اياقتالعان سوڭ قاراپ وتىرىپ تاڭ- تاماشا بولدىم. مەن ىزدەگەن سۇلۋلىق وسى ەدى. كوپ كۇتكەن كەيىپكەرىمدى تاپتىم. ۇلكەن تۋىندىم دۇنيەگە كەلدى. قۋانىشىمدا شەك بولمادى. ءوز شىعارمامنان ەشقاشان بۇنداي اسەر العان ەمەسپىن.

اياۋلى كەيىپكەرىم ءوزىنىڭ سۋرەتىن كورگىسى كەلدى. قانشا قالاپ، قيىلىپ سۇراعانىمەن، وعان ءوزى اسپەتتەلگەن پورترەتتى كورسەتپەدىم. جانە سەبەبى دە جوق ەمەس.

بۇل قىز مەن ءۇشىن بار بولعانى كەيىپكەرىمنىڭ پروتوتيپى عانا. ارى كەتسە فيلوسوفيا فاكۋلتەتىنىڭ وزات ستۋدەنتى دەپ قابىلدايتىنمىن. سۇلۋ قىز ەكەنى ەكىباستان بەلگىلى. باسقا ويىم جوق ەدى...

بۇگىنگىدەي اتالى كۇندى اتاۋسىز قالدىرۋعا بولماس دەپ شەشتىم. ءبىز ارزانقول كافەلەردىڭ بىرىنە بارىپ، داستارحانعا جايعاستىق. وزىمە ەڭ قىمبات كونياك، وعان جەمىس شىرىنىن الدىم.

ەكەۋارا ارنارسەنى ءسوز قىلىپ وتىردىق. ول ماعان شىعارماشىلىق تابىس تىلەدى. مەن وعان باقىت تىلەدىم. وسىلاي توست كوتەرىپ وتىردىق. ەركەك بولعان سوڭ سول دا: ءسال قىزىڭقىراپ ەدىم وتىرىك ايتا باستادىم. «ساعان عاشىقپىن، سەنسىز ءومىر سۇرە المايمىن» دەدىم. قىزدى- قىزدىمەن سۇيەم دەگەن دە شىعارمىن. بۇل وتىرىكتەردى نە ءۇشىن ايتىپ وتىرمىن؟ اقىماق قىز نە ءۇشىن سەنىپ وتىر؟ وسى وتىرىك ءبىز سىرتقا شىعىپ باياعىدا ەكەۋمىز العاش كەزدەسكەن ساياباققا جەتكەنگە دەيىن جالعاستى. ءبىز بۇرىنعى ساكىگە بارىپ جايعاستىق. مەن ونى قۇشاقتاپ وتىر ەكەنمىن. ماس بولىپ قالىپتىم. ەڭ عاجابى سول - وسى ساتتەردە مەنىڭ وتىرىگىم شىنعا اينالىپ بارا جاتتى... «ساعان عاشىقپىن، سەنسىز ءومىر سۇرە المايمىن» دەگەندەرىمنىڭ بارلىعى دا و باسىندا ايتىلعاندا وتىرىك بولىپ باستالعانىمەن، بىرتە-بىرتە كەۋدەمدەگى شىندىعىما ۇلاسقانىن بايقادىم. وتىرىك ەدى، عوي.

- سەنىڭ ونەرگە دەگەن كوزقاراسىڭدى بىلگىم كەلەدى؟ - دەدىم ونىڭ شاشتارىن ساۋساقتارىممەن سالالاپ وتىرىپ. ول بولسا يىعىمنان باسىن كوتەرمەگەن قالپىندا:

- بىلگىڭىز كەلسە ايتايىن. مەنىڭ ونەرگە دەگەن كوزقاراسىم، ءسىزدىڭ ومىرگە دەگەن كوزقاراسىڭىزعا قاتتى ۇقسايدى، - دەدى.