جيگۋلي دايرابايەۆ: مەنىڭ قاعيدام - سىرتتان جاۋ، ىشتەن داۋ كىرگىزبەۋ

استانا. قازاقپارات - «اۋىل» حالىقتىق-دەموكراتيالىق پاتريوتتىق پارتياسىنىڭ اتىنان كەزەكتەن تىس پرەزيدەنت سايلاۋىنا تۇسەتىن جيگۋلي دايرابايەۆ ءوزىنىڭ سايلاۋالدى باعدارلاماسىنىڭ نەگىزگى باعىتتارى قانداي بولاتىنىن ايتتى، دەپ حابارلايدى قازاقپارات ءتىلشىسى.

«مەن پرەزيدەتىككە كانديدات بولماي تۇرعان كەزدىڭ وزىندە دە كوتەرىپ جۇرگەن ماسەلەلەرىم بار. مىسالى، جاستاردىڭ ءبارى اۋىلدان قالاعا كەتىپ جاتىر. اۋىل شارۋاشىلىعىندا ەڭبەك ونىمدىلىگى تومەن. وزدەرىڭىز بىلەسىزدەر، بۇرىن ۇيىمداستىرىلعان شارۋاشالىقتار بولسا، قازىر 280-300 مىڭعا جۋىق ءار ءتۇرلى فورماداعى شارۋاشىلىق قۇرىلىم جۇمىس ىستەيدى. اۋىلدا ينفراقۇرىلىمنىڭ احۋالى ناشار. سونى تۇزەۋ - ءبىزدىڭ پارتيانىڭ نەگىزگى ماقساتتارىنىڭ ءبىرى. سول اۋىلداعى ينفراقۇرىلىمدى كوتەرۋ ارقىلى، اگرارلىق سالانى دامىتۋ ارقىلى ەلدىڭ ازىق-تۇلىك قاۋىپسىزدىگىن قامتاماسىز ەتۋدى كوزدەيمىز»، - دەدى قازاقستان فەرمەرلەر قاۋىمداستىعىنىڭ باسقارما ءتوراعاسى.

سونداي-اق اۋىل پارتياسىنىڭ وڭىرلەردەگى بولىمشەلەرىنىڭ كومەگىمەن كانديدات رەتىندە تىركەلۋگە قاجەت 120 مىڭ داۋىستى جيناي الاتىنىن سەنىمدى ەكەنىن ايتتى.

«قازىرگى گەوساياسي احۋالدى دا ەسكەرىپ وتىرمىز. ونى وزدەرىڭىز دە كورىپ، ءبىلىپ وتىرسىزدار. سوندىقتان باستى ماسەلە مەملەكەتتىڭ، حالىقتىڭ بىرلىگى بولۋى كەرەك. قوعامدا تىنىشتىق بولۋى قاجەت. قازاق باتا بەرگەندە ايتاتىن ءسوز بار. «سىرتىمىزدان داۋ كىرمەسىن، ىشىمىزدەن داۋ كىرمەسىن» دەيدى. مەنىڭ نەگىزگى قاعيدام سولاي»، - دەدى جيگۋلي دايرابايەۆ.