مەملەكەت باسشىسى اباي مەكتەپتەرىندەگى ورىن تاپشىلىعىن ءبىرجولا شەشۋدى تاپسىردى

سەمەي. قازاقپارات - ءبىلىم - باسەكەگە قابىلەتتى جانە تابىستى ۇلت بولۋدىڭ باستى كەپىلى. بۇل تۋرالى پرەزيدەنت قاسىم-جومارت توقايەۆ ابايلىقتارمەن كەزدەسۋدە ايتتى، دەپ حابارلايدى قازاقپارات.

«قازىر ەلىمىزدە «جايلى مەكتەپ» ۇلتتىق جوباسى قولعا الىنىپ جاتىر. اباي وبلىسىنداعى مەكتەپتەردە 9 مىڭعا جۋىق بالاعا ورىن جەتىسپەيدى. الداعى ۋاقىتتا 11 مەكتەپ جانە 14 بالاباقشا سالۋ جوسپارلانعان. ءبىراق، مۇنىڭ ءوزى جەتكىلىكسىز. ۇكىمەت پەن اكىمدىككە وبلىس مەكتەپتەرىندەگى ورىن تاپشىلىعى ماسەلەسىن ءبىرجولا شەشۋدى تاپسىرامىن»، - دەدى مەملەكەت باسشىسى.

ول قازاق حالقىنىڭ ۇستازدى قۇرمەت تۇتقانىن اتاپ ءوتتى.

«بۇل ءسوزىمىز ناقتى ىسپەن بەكىتىلىپ جاتىر. ارنايى وقۋ-اعارتۋ مينيسترلىگى قۇرىلدى. ءبىز بۇعان دەيىن «پەداگوگتاردىڭ مارتەبەسى تۋرالى» زاڭ قابىلداپ، ونىڭ اياسىندا مۇعالىمدەردىڭ جالاقىسىن وسىردىك. «الىپپەنى» قايتاردىق.

ورتا ءبىلىمدى دامىتۋعا باعىتتالعان ءبىرقاتار جاعىمدى وزگەرىستەر بار. وسىنداي يگى شارالار ارقىلى ءبىز قوعامدا مۇعالىمنىڭ مارتەبەسىن ودان ءارى بيىكتەتەمىز. ۇستاز ءبىزدىڭ قوعامدا ءاردايىم سىيلى تۇلعا بولادى»، - دەدى قاسىم-جومارت كەمەل ۇلى.