تۇركىستان وبلىسىندا لومباردقا قارۋلى شابۋىل جاسالدى
جەتىساي اۋداندىق پوليسيا بولىمىنە قالادا ورنالاسقان لومباردتاردىڭ ءبىرىنىڭ قىزمەتكەرى ارىزدانعان. ايتۋىنشا، كەشكى ۋاقىتتا بەتىنە مەديتسينالىق ماسكا، باسىنا بەيسبولكا كيگەن ەر ادام قارۋ ۇستاپ كىرىپ كەلىپ، اقشا تالاپ ەتكەن. ۇرەيى ۇشقان لومبارد قىزمەتكەرى كاسساداعى 1,2 ميلليون تەڭگەنى ۇستاتقان. كۇدىكتى ونى كاسسا كابيناسىندا قالدىرىپ، سىرتىنان قۇلىپتاعان. سولاي ءىزىن سۋىتقان.
اتالعان جايت ق ر قىلمىستىق كودەكسىنىڭ 191-بابى (توناۋ) بويىنشا تىركەدى.
«اتالعان اۋىر قىلمىستى اشۋ ءۇشىن پوليتسيا ءبولىمىنىڭ تاجىريبەلى قىزمەتكەرلەرىنەن جەدەل- تەرگەۋ توبى قۇرىلىپ، وقيعا ورنىنا شۇعىل جەتتى.
پوليسەيلەر كۇدىكتىنى «ءىزىن سۋىتپاي» قۇرىقتاۋ ماقساتىندا قاجەتتى شارالاردى جۇزەگە اسىردى. ناتيجەسىندە بىرنەشە كۇن ىشىندە بەينەباقىلاۋ كامەراسىنداعى جازبا ارقىلى كۇدىكتىنىڭ جەكە باسى انىقتالدى. ءتارتىپ ساقشىلارى سەزىكتىنى تۇرعىلىقتى مەكەنجايىنان ۇستاپ، پوليتسياعا جەتكىزدى. ول جۇمىسسىز، جەرگىلىكتى تۇرعىن بولىپ شىقتى.
انىقتالعانداي، كۇدىكتى توناۋ ارەكەتىنە بارماس الدىن قالاداعى ءبىرقاتار لومباردتى باقىلاپ شىققان. سودان جابىرلەنۋشى تاراپتىڭ لومباردى كەشكە دەيىن ىستەيتىنىن ءبىلىپ، ونى توناۋدى ويلاستىرعان. بارىنشا قاراڭعى تۇسكەنىن پايدالانىپ، ويىن جۇزەگە اسىرعان»، - دەلىنگەن پوليتسيا مالىمەتىندە.
كۇدىكتىڭ سوزىنشە، ول قىلمىسقا اقشا قاجەت بولعاندىقتان بارعان. ايعاقتى زات رەتىندە پنيەۆماتيكالىق تاپانشا الىندى. قازىرگى تاڭدا ول قاماۋعا الىنىپ، تەرگەۋ امالدارى جۇرگىزىلىپ جاتىر.
