ءماجىلىس اكىمدەردى تاعايىنداۋ مەن سايلاۋ ءتارتىبىن وزگەرتۋگە قاتىستى قۇجاتتى ماقۇلدادى

استانا. قازاقپارات - ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ 2022-جىلعى 16 - ناۋرىزداعى جولداۋىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

زاڭ جوباسىنىڭ نەگىزگى ماقساتى - قازاقستان رەسپۋبليكاسىنىڭ قولدانىستاعى زاڭناماسىن مەملەكەت باسشىسى جاريالاعان ساياسي رەفورمانى ىسكە اسىرۋ اياسىندا ەنگىزىلەتىن وزگەرىستەر مەن تولىقتىرۋلارعا سايكەس كەلتىرۋ.

اتاپ ايتقاندا، قۇجاتتا جەرگىلىكتى اتقارۋشى ورگاندارعا قاتىستى ق ر پرەزيدەنتىنىڭ جەكەلەگەن وكىلەتتىكتەرىن جويۋ، سايلاۋ جۇيەسىن جەتىلدىرۋ، اكىمدەردى تاعايىنداۋ مەن سايلاۋ ءتارتىبىن وزگەرتۋ، ساياسي پارتيالاردى تىركەۋ راسىمدەرىن وڭايلاتۋ، زاڭ شىعارۋ ءراسىمىن وزگەرتۋ جانە قۇقىق قورعاۋ ينستيتۋتتارىن كۇشەيتۋ ەسكەرىلگەن.

سونىمەن قاتار زاڭ جوباسىندا جەرگە، ونىڭ قويناۋىنا، سۋ كوزدەرىنە، وسىمدىكتەر مەن جانۋارلار دۇنيەسىنە، باسقا دا تابيعي رەسۋرستارعا قاتىستى حالىق مەنشىگىن بەلگىلەۋ قامتىلعان.

بۇدان بۇرىن حابارلانعانداي، 2023-جىلدان باستاپ قاناتقاقتى رەجيمدە اۋداندار مەن وبلىستىق ماڭىزى بار قالالار اكىمدەرىن سايلاۋ وتكىزىلەدى.