ەرلان قوشانوۆ ماجىلىسكە دايىندىقسىز كەلگەن مينيسترلىكتەر وكىلدەرىنە ەسكەرتۋ جاسادى
بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ جەكەلەگەن تاپسىرمالارىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.
وتىرىس كەزىندە كەيبىر مينيسترلىكتەردىڭ وكىلدەرى دەپۋتاتتاردىڭ ساۋالىنا تولىق جاۋاپ بەرە المادى.
«كەيبىر مينيسترلىكتەردىڭ وكىلدەرىنە ەسكەرۋ ايتقىم كەلەدى. جالپى وتىرىسقا دايىندالىپ كەلۋ كەرەك. قول استىنداعى ادامداردىڭ قولدارىڭىزعا جازىپ بەرگەن انىقتاماسىن وقىپ بەرۋ قاجەت ەمەس. وسى سۇراقتاردىڭ بارلىعى بۇعان دەيىن جۇمىس توبىندا، كوميتەتتىڭ وتىرىسىندا تالقىلاندى. ەندى وسى جالپى وتىرىستا قارالاتىن تاقىرىپتى ەگجەي-تەگجەيلى ءبىلىپ تۇرۋلارىڭىز كەرەك قوي. ۇكىمەتتىڭ وكىلىنە دە وسى ەسكەرتپەنى ايتامىن»، - دەدى ە. قوشانوۆ.
وسى ورايدا ءماجىلىس ءتوراعاسى بۇل ەسكەرتۋدى پرەمەر-مينيسترگە جەتكىزۋدى تاپسىردى.
«ەگەر وسىندا دايىن ەمەس مينيسترلىكتەردىڭ وكىلدەرى بولسا، وندا ورنىنا باسقا ادامدار كەلسىن»، - دەپ ەسكەرتتى ەرلان قوشانوۆ.
