قازاقستاندىق دەلەگاتسيا سيندزو ابەنى مەملەكەتتىك جەرلەۋ راسىمىنە قاتىستى - فوتو

توكيو. قازاقپارات – ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى جاپونيانىڭ بۇرىنعى پرەمەر-ءمينيسترى سيندزو ابەنى مەملەكەتتىك جەرلەۋ راسىمىنە قاتىستى.

بۇل تۋرالى ق ر سىرتقى ىستەر مينيسترلىگىنىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات.

رەسمي راسىمگە 6 مىڭنان استام ادام، ونىڭ ىشىندە جاپونيانىڭ جوعارى لاۋازىمدى ساياساتكەرلەرى، پارلامەنت دەپۋتاتتارى جانە 200-دەن استام ەل مەن حالىقارالىق ۇيىمداردىڭ شەتەلدىك دەلەگاتسيالارى قاتىستى.

بۇل - Ⅱ دۇنيەجۇزىلىك سوعىستان كەيىن ەل تاريحىنداعى بۇرىنعى پرەمەر-ءمينيستردى ەكىنشى مەملەكەتتىك جەرلەۋ ءراسىمى بولدى. 1967 -جىلى جاپونيا ەلى ەشيدا سيگەرۋمەن قوشتاسقان بولاتىن. س. ابە جاپونيانىڭ پرەمەر-ءمينيسترى لاۋازىمىندا ەڭ ۇزاق قىزمەت ەتكەن كورنەكتى ساياساتكەر رەتىندە ءوز حالقىنىڭ ەسىندە قالدى.

ءىس-شارا سوڭىندا قازاقستان دەلەگاتسياسىنىڭ باسشىسىن جاپونيا پرەمەر-ءمينيسترى فۋميو كيشيدا قابىلدادى. مۇحتار تىلەۋبەردى پرەزيدەنت قاسىم-جومارت توقايەۆتىڭ، ۇكىمەتتىڭ جانە قازاقستان حالقىنىڭ اتىنان كوڭىل ايتتى.

مينيستر جاپونيانىڭ اسا كورنەكتى كوشباسشىلارىنىڭ ءبىرى بولعان س. ابەنىڭ قازاقستان-جاپونيا قارىم-قاتىناستارىن دامىتۋعا قوسقان ەرەكشە ۇلەسىن اتاپ ءوتتى.

س. ابە 2015 -جىلى قازاقستانعا رەسمي ساپارمەن كەلدى جانە ەكىجاقتى ىنتىماقتاستىقتى كەڭەيتىلگەن ستراتەگيالىق ارىپتەستىك دەڭگەيىنە شىعارۋدىڭ باستاماشىسى بولدى.

فۋميو كيشيدا قازاقستان حالقىنا قولداعانى ءۇشىن العىسىن ءبىلدىرىپ، مەملەكەت باسشىسىنا ىزگى تىلەكتەرىن جولدادى.

بۇعان دەيىن مەملەكەت باسشىسىنىڭ تاپسىرماسىمەن ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى جاپونيانىڭ بۇرىنعى پرەمەر-ءمينيسترى سيندزو ابەنى مەملەكەتتىك جەرلەۋ راسىمىنە قاتىسۋ ءۇشىن توكيوعا بارعانى حابارلانعان ەدى.

ەسكە سالساق، جاپونيانىڭ بۇرىنعى پرەمەر-ءمينيسترى سيندزو ابەنى بەلگىسىز بىرەۋ اتىپ كەتكەن بولاتىن. ارادا بىرنەشە ساعات وتكەندە ەكس-پرەمەر اۋرۋحانادا كوز جۇمدى.

پرەزيدەنت قاسىم-جومارت توقايەۆ جاپونيانىڭ بۇرىنعى پرەمەر-ءمينيسترى سيندزو ابەنىڭ قاستاندىق ارەكەت سالدارىنان قازا بولعانى تۋرالى سۋىت حاباردى تەرەڭ كۇيزەلىسپەن قابىلداپ، جاپونيا پرەمەر-ءمينيسترى فۋميو كيشيداعا كوڭىل ايتۋ جەدەلحاتىن جولدادى.

سونداي-اق، ق ر پرەمەر-ءمينيسترى ءاليحان سمايىلوۆ جاپونيا ەلشىلىگىنە بارىپ، كورنەكتى ساياسي قايراتكەر، بۇرىنعى پرەمەر-مينيستر سيندزو ابەنىڭ قازا بولۋىنا بايلانىستى وسى ەلدىڭ حالقىنا كوڭىل ايتتى.