اقتوبەدە قوي ءجۇنىن وڭدەيتىن زاۋىت سالىنادى

اقتوبە. كازاقپارات - اقتوبەدە قوي ءجۇنىن قابىلداپ، جىلۋ ساقتاۋعا ارنالعان ماتەريال دايىندايتىن زاۋىت سالىنادى.

بۇل قۇرىلىستى يتالياندىق ينۆەستورلار قولعا الدى، دەپ حابارلايدى قازاقپارات ءتىلشىسى.

اقتوبە وبلىسىنىڭ اكىمى ەرالى توعجانوۆ «Kazfeltec» ج ش س قۇرىلتايشىسى اسەت تىلەۋوۆپەن جانە يتالياندىق «Cormatex» كومپانياسىنىڭ وكىلى ليۋكا كۋەرچيمەن ىسكەرلىك كەزدەسۋ وتكىزدى. كەزدەسۋ بارىسىندا كاسىپورىن جەتەكشىلەرى ءۇي مەن باسقا دا نىسانداردا جىلۋ ساقتاۋعا ارنالعان قۇرىلىس ماتەريالىنىڭ ارتىقشىلىعى تۋرالى ايتتى. شيكىزات - قوي ءجۇنى. تاراپتار زاۋىت سالۋ جانە ىسكە قوسۋ كونسورتسيۋمىن قۇرۋ تۋرالى كەلىسىمگە قول قويدى.

قۇرىلىس ماتەريالدارى قىلشىقتى جۇننەن جاسالادى. قازىرگى تاڭدا اقتوبە وبلىسىندا جىل سايىن 3,5 مىڭ توننا ءجۇن جينالىپ، سۇرانىسقا يە بولماي قالىپ جاتىر. وبلىس اكىمى جوباعا وڭ باعا بەرىپ، جەرگىلىكتى اتقارۋشى ورگان تاراپىنان قولداۋ بولاتىنىن ايتتى. اسىرەسە ءجۇن جيناۋعا قول ۇشىن سوزباق.

«ءاربىر اۋداندا جيناقتاۋ پۋنكتتەرىن اشۋ مۇمكىندىگى قارالاتىن بولادى. ساتىپ الۋدى جۇيەلەۋ قاجەت. جەرگىلىكتى تۇرعىنداردان ساتىپ الۋعا باسىمدىك بەرىلەدى»، - دەدى ەرالى توعجانوۆ.

ينۆەستيتسيانىڭ جالپى كولەمى 10 ميلليون ەۋرونى قۇرايدى. اقتوبە قالاسىندا قۇرىلىسقا دايىندىق باستالدى. العاشقى ءونىم 2023 -جىلدىڭ كۇزىندە شىعارىلادى. ءوندىرىس ىسكە قوسىلعاننان كەيىن بۇكىل وبلىس بويىنشا شيكىزات قابىلداۋ پۋنكتتەرىن ەسەپتەمەگەندە، زاۋىتتىڭ وزىندە 20-دان استام جاڭا تۇراقتى جۇمىس ورنى اشىلادى.