اقان ساتايەۆ «قازاق فيلم» باسشىلىعىنان كەتتى

استانا. قازاقپارات - تانىمال قازاقستاندىق رەجيسسەر اقان ساتايەۆ ش. ايمانوۆ اتىنداعى «قازاق فيلم» ا ق پرەزيدەنتى قىزمەتىنەن كەتتى.

بۇل تۋرالى ق ر مادەنيەت جانە سپورت ءمينيسترى داۋرەن ابايەۆ Facebook جەلىسىندە جازدى، دەپ حابارلايدى قازاقپارات ءتىلشىسى.

«قىمباتتى دوستار، وسى جازبامدا تالانتتى جانە تابىستى رەجيسسەر اقان ساتايەۆقا «قازاق فيلم» ا ق پرەزيدەنتى رەتىندە قاجىرلى، ەڭ باستىسى جەمىستى ەڭبەگى ءۇشىن ۇلكەن العىس بىلدىرگىم كەلەدى. بۇگىن اقان قارعامباي ۇلى اتى اڭىزعا اينالعان كينوستۋديانىڭ باسشىسى قىزمەتىنەن ءوز ەركىمەن كەتتى»، - دەپ جازدى مينيستر.

«ونىڭ الداعى شىعارماشىلىق جولى ءبىزدىڭ كينەماتوگرافىمىزدىڭ دامۋىنا ۇلەس قوساتىن سەرپىندى جوبالارمەن تولىعاتىنىنا سەنىمدىمىن»، - دەيدى داۋرەن ابايەۆ.

ەسكە سالايىق، اقان ساتايەۆ «قازاق فيلم» ا ق پرەزيدەنتى بولىپ 2020-جىلى تاعايىندالعان ەدى.

رەجيسسەر 2003-جىلى «Sataifilm» ستۋدياسىنىڭ نەگىزىن قالاپ، 2007-جىلى «رەكەتير» اتتى العاشقى تولىقمەتراجدى فيلمىن، «اداسقان» ميستيكالىق تريللەرىن (2009)، «اعايىندى» سەريالىن (2009)، «ليكۆيداتور» پسيحولوگيالىق دراماسىن (2011)، «جاۋجۇرەك مىڭ بالا» تاريحي فيلمىن (2012) ءتۇسىردى. سونداي-اق «رايونى» كريمينالدىق دراماسى مەن «اناعا اپارار جول» تاريحي دراماسىنىڭ (2016)، «بيزنەسمەنى» (2018)، «توميريس» (2019) جانە تاعى باسقا تۋىندىلاردىڭ رەجيسسەرى.

2014-جىلى كينويندۋستريا سالاسىنىڭ ۇزدىك وكىلى رەتىندە «حالىق سۇيىكتىسى» ۇلتتىق سىيلىعىنا يە بولدى. 2016-جىلى جاس رەجيسسەرلەردى قولداۋعا باعىتتالعان Astana Film Found قورىنىڭ نەگىزىن قالاعان.