مەملەكەت باسشىسى شاتىر باسىپ قالعان تۋدى كوتەرگەن ازاماتتارعا العىس ايتتى

شىمكەنت. قازاقپارات – ق ر پرەزيدەنتى قاسىم-جومارت توقايەۆ بىلتىر سپورت كەشەنىنىڭ شاتىرى استىندا قالعان تۋدى الىپ شىققان شىمكەنتتىك ازاماتتارعا العىس ايتتى، دەپ حابارلايدى.

«بىلتىر ستاديوندا فۋتبول ماتچى بولىپ جاتقاندا سپورت كەشەنىنىڭ شاتىرى تۋدىڭ تۇعىرىن باسىپ قالعانى ەلدىڭ ەسىندە. سول كەزدە تۇرعىندار قاۋىپ-قاتەرگە قاراماستان، شاتىردىڭ استىنان كوك بايراعىمىزدى الىپ شىقتى. شىنايى وتانشىلدىق وسىنداي ارەكەتتەن كورىنەدى. قۇر سوزدەن تۇك شىقپايدى. الاڭدارعا شىعىپ، جالعان ۇران تاستاپ جۇرگەندەردىڭ، مەنىڭشە، ناعىز وتانسۇيگىشتىككە ەشقانداي قاتىسى جوق. قاستەرلى تۋىمىزدى جەرگە تۇسىرمەي الىپ شىققان بىرنەشە جىگىت بۇگىن ورتامىزدا وتىر. ولاردىڭ وتانعا دەگەن ادالدىعىن جاستارعا ۇلگى ەتۋىمىز كەرەك. وسىعان وراي، مەن ءابىلقايىر داۋلەتوۆ، بەكمۇرات قارايەۆ جانە نۇركەن نامازعا العىسىمدى جاريالايمىن»، - دەدى مەملەكەت باسشىسى قاسىم-جومارت توقايەۆ شىمكەنت قالاسىنىڭ جۇرتشىلىعىمەن كەزدەسۋىندە.