قازاقستان اسكەردەن قاشقان رەسەيلىكتەردى ەلدەرىنە قايتارا ما - مينيستر جاۋابى
ق ر ىشكى ىستەر ءمينيسترى مارات احمەتجانوۆ وسىنداي دەپ ءمالىم ەتتى، دەپ حابارلايدى قازاقپارات ءتىلشىسى.
«قازاقستان اسكەري موبيليزاتسيالاۋدان قاشقان رەسەيلىكتەر ەلدەرىنە قايتارا ما؟»، - دەپ سۇرادى جۋرناليست ورتالىق كوممۋنيكاتسيالار قىزمەتىندە وتكەن بريفينگىدە.
ءمينيستردىڭ ايتۋىنشا، ەكستراديالاۋ شاراسى قىلمىستىق ءىس قوزعالعان ادامداردى عانا قامتۋى كەرەك.
«بىزدە رەسەيمەن قۇقىقتىق كومەك كورسەتۋ تۋرالى - سوتتالعانداردى الماسۋ جانە قىلمىسكەرلەردى ەكستراديتسيالاۋ بويىنشا كەلىسىمشارت قاتىناسى بار. ەڭ نەگىزگى قاعيدات - ءبىز جاقتا دا، ول تاراپتا دا بۇل قىلمىستىق جازاعا تارتىلاتىن ارەكەت بولۋى كەرەك. وعان قوسا حالىقارالىق ىزدەۋ جاريالانعان ازاماتتى سۇراتىپ وتىرسا، قازاقستان اۋماعىندا وزگە كەدەرگىلەر بولماسا، انىقتاپ، ەكستراديتسيالاۋ ءتارتىبى بويىنشا رەسەي فەدەراتسياسىنا تاپسىرامىز»، - دەدى مارات احمەتجانوۆ.
سونداي-اق ول قازىرگى تاڭدا رەسەي تاراپىنان دا، قازاقستان تاراپىنان دا مينسك كونۆەنتسياسىنىڭ اياسىندا دا، قۇقىقتىق كومەك كورسەتۋدىڭ پارلامەنتتەر راتيفيكاتسيالاعان كەلىسىمى اياسىندا دا كۇن سايىن ادام الماسۋ ءجۇرىپ جاتقانىن اتاپ ءوتتى.
«بۇل جەردە اسكەري موبيليزاتسيا تۋرالى اڭگىمە جوق. مەن جۇمىلدىرۋ تۋرالى ايتىپ وتىرعان جوقپىن. تىركەلىپ، سانكتسيالانعان، حالىقارالىق ىزدەۋ جاريالانعان قىلمىستىق زاڭ بۇزۋلار تۋرالى ايتىپ وتىرمىن. رەسەيدىڭ اسكەري كوميسسارياتتارى ىزدەۋ سالاتىن بولسا، بۇل ولاردى رەسەيگە تابىستاۋعا قۇقىقتىق نەگىز بولمايدى»، - دەدى مينيستر.
