رەسەيلىكتەردى پاتەرىنە پانالاتقان قازاقستاندىقتار نەنى ەسكەرۋى كەرەك

استانا. قازاقپارات – ق ر ىشكى ىستەر ءمينيسترى مارات احمەتجانوۆ كەيىنگى كۇندەرى شەكارادان اعىلىپ كەلىپ جاتقان رەسەيلىكتەردى پاتەرىنە پانالاتقان قازاقستاندىقتار نەنى ءبىلۋ كەرەكتىگىن ايتتى، دەپ حابارلايدى قازاقپارات ءتىلشىسى.

«شەتەلدەن كەلگەن ميگرانتتاردى جۇمىسقا العان نەمەسە پاتەر بەرگەن قازاقستاندىق بۇل تۋرالى 3 كۇن ىشىندە حابارلاماسا، ايىپپۇل سالىنادى. وسىنداي ساناتتاعى قانشا زاڭسىزدىق تىركەلدى؟ ىشكى ىستەر مينيسترلىگىنىڭ وكىلى كوشى- قون زاڭناماسىن بۇزعان 3200 رەسەيلىك جاۋاپقا تارتىلعانى تۋرالى دەرەك كەلتىرگەن بولاتىن. ولارعا قانداي جازا بار؟» دەپ سۇرادى ب ا ق وكىلى ورتالىق كوممۋنيكاتسيالار قىزمەتىندە وتكەن بريفينگىدە.

مينيستر مۇنداي جاعدايدا جاۋاپكەرشىلىك ءبىرىنشى كەزەكتە قارسى الۋشى تۇرعىندارعا جۇكتەلەتىنىن ەسكە سالدى.

«بۇل جەردە ايتىپ كەتۋ كەرەك، جاۋاپكەرشىلىك كەلگەن ازاماتقا ەمەس، ونى ۋاقىتىندا تىركەمەگەن جەرگىلىكتى ازاماتقا تيەسىلى. قوناق ءۇي ۇسىنسا دا، ءوز پاتەرىنە پانالاتسا دا 3 كۇننىڭ ىشىندە ىشكى ىستەر ورگاندارىنا حابارلاما بەرمەسە، سول كەزدە ءۇي يەسىنىڭ جاۋاپكەرشىلىگى قاراستىرىلادى. مالىمەتتەردى بۇگىن عانا ءبىزدىڭ وكىلىمىز ارنايى بريفينگىدە ايتتى. ونىڭ ءبارى ءبىزدىڭ اكىمشىلىك قۇقىق بۇزۋ تۋرالى كودەكستىڭ 517, 518-باپتارىندا كوزدەلگەن. ارينە، ەگەر ورەسكەل زاڭبۇزۋشىلىق بولسا، ولار اكىمشىلىك جاۋاپقا تارتىلادى»، - دەدى مارات احمەتجانوۆ.