استانادا «دوس- مۇقاسان» فيلمىنىڭ پرەمەراسى ءوتتى - فوتو
اتى اڭىزعا اينالعان مۋزىكالىق انسامبل تۋرالى كوركەم دراما 29-قىركۇيەكتە قازاقستان بويىنشا پروكاتقا شىعادى، دەپ حابارلايدى قازاقپارات.
فيلمدى ەفرات ءشارىپوۆتىڭ سەناريى بويىنشا «Aray Media Group» ستۋدياسى تۇسىرگەن.
كارتينانىڭ پروديۋسەرى ايگۇل بايبەك، ال مۋزىكالىق درامانىڭ رەجيسسەرى - ايدىن ساحامان. كينوجوبا ق ر مادەنيەت جانە سپورت مينيسترلىگى مەن ۇلتتىق كينەماتوگرافيانى قولداۋ مەملەكەتتىك ورتالىعىنىڭ قولداۋىمەن تۇسىرىلگەن.
فيلمنىڭ باس پروديۋسەرى ايگۇل بايبەكتىڭ ايتۋىنشا، «دوس- مۇقاسان» ۆوكالدى- اسپاپتىق انسامبلى - ءبىزدىڭ ماقتانىشىمىز.
«ولار جايلى فيلم ءتۇسىرۋ - ءبىز ءۇشىن ۇلكەن مارتەبە. بۇل مەنىڭ باس پروديۋسەر رەتىندەگى العاشقى تولىقمەتراجدى كوركەم فيلمىم. كاسىبي مۋزىكانت رەتىندە مەن ءۇشىن اتى اڭىزعا اينالعان انسامبلدىڭ نەگىزىن قالاۋشىلارمەن بىرگە قۇرىلۋ تاريحىن زەرتتەپ، جەكە ارالاسۋ، ونەردىڭ ەڭ نازىك باعىتى - مۋزىكا جايلى فيلم ءتۇسىرۋ قىزىق بولدى. ءبىز فيلم سيۋجەتىنە وزەك بولعان «دوس مۇقاساننىڭ» شىنايى تاريحىن جەتكىزۋگە، سول كەزدەگى مۋزىكالىق رۋحتىڭ ەرەكشە اتموسفەراسىن جاساۋعا تىرىستىق»، - دەيدى ول.
فيلم رەجيسسەرى ايدىن ساحامان فيلمگە تارتىلعان اكتەرلەردىڭ كاسىبيلىگى، مۋزىكالىق العىرلىعى، حاريزماسىنىڭ ماڭىزى از ەمەستىگىن ايتادى.
«جاس ارتىستەرىمىزدىڭ اكتەرلىك شەبەرلىگى بارلىق جاس ساناتى ءۇشىن قىزىقتى كارتينا جاساۋعا مۇمكىندىك بەردى. ەرەسەك ۇرپاق ءۇشىن بۇل جاستىق اتموسفەراسىن سەزىنۋ مۇمكىندىگى، ال جاس ۇرپاق ۆوكالدى- اسپاپتىق انسامبلدىڭ تاريحىمەن تانىسۋعا مۇمكىندىك الادى»، - دەپ اتاپ ءوتتى ايدىن ساحامان.
بايوپيكتى سەنىمدى تۇردە بەيىمدەۋ جانە وعان قازاق روكىنىڭ نەگىزىن قالاۋشىلاردىڭ قايتالانباس تارتىمدىلىعىن بەرۋ ءۇشىن باس كەڭەسشى رەتىندە ۆوكالدى- اسپاپتىق انسامبلدىڭ نەگىزىن سالۋشىلار مۇرات قۇسايىنوۆ پەن دوسىم سۇلەيەۆ شاقىرىلدى.
فيلمنىڭ اكتەرلىك قۇرامى پورترەتتىك ۇقساستىق بويىنشا تاڭدالدى.
باستى رولدەردى اكتەر مەيىرعات امانگەلدين، ماقسات ءسابيتوۆ، ەلدوس شايكەنوۆ، سايات ماقۇلبايەۆ، ايعانىم ساعىنبايەۆا، نيكيتا پوگودايەۆ، نۇرعيسا قۋانىشباي ۇلى جانە ءابىلمانسۇر سەرىكوۆ سومدادى.
تانىمال بلوگەرلەر مەن ۆاينەرلەر ارتۋر اسقار ۇلى مەن زۋحرا سايپي دە فيلمدە دەبيۋت جاسادى.
«اۆتورلار ەڭ باستىسى، ءبىزدىڭ مۋزىكاعا دەگەن سۇيىسپەنشىلىگىمىزدى، كوڭىل- كۇيىمىزدى، سول كەزدەگى اتموسفەرانى جەتكىزە الدى. ۇزاق جىلدار بويى كادر سىرتىندا، ساحنا ارتىندا قالعانى - جولىمىزداعى قيىندىقتار مەن ينتريگالار، كەڭەستىك يدەولوگياعا قايشى كەلەتىن ءوز ستيلىمىزدى ساقتاۋداعى قيىندىقتار، ۇجىم ىشىندەگى قارىم-قاتىناستار مەن رەنىشتەر تولىعىمەن دەرلىك بۇرمالانباي كورسەتىلدى» - دەيدى انسامبلدىڭ نەگىزىن قالاۋشى دوسىم سۇلەيەۆ.
رەداكتور جانات قاپالبايەۆا
