و س ك سايلاۋ بيۋللەتەنىندەگى «بارلىعىنا قارسىمىن» باعانىن ءتۇسىندىردى

استانا. قازاقپارات - ورتالىق سايلاۋ كوميسسياسى ق ر پەزيدەنتى سايلاۋى بيۋللەتەنىندە بولاتىن بارلىق كانديداتقا قارسى داۋىس بەرۋ مۇمكىندىگىن ءتۇسىندىردى، دەپ حابارلايدى قازاقپارات ءتىلشىسى.

«بارلىق كانديداتتارعا قارسى داۋىس بەرۋ ارقىلى ازاماتتار ءوز تاڭداۋىن بىلدىرە الادى. دەگەنمەن قارسى داۋىسقا قاراماستان 50 پايىزدان استام داۋىس جيناعان كانديدات جەڭىمپاز بولادى. ەگەر ءبىرىنشى تۋردا ناتيجە ناقتى بولماسا، وندا قايتا داۋىس بەرىلەدى. سودان كەيىن كوپشىلىكتىڭ داۋسىن جيناعان ەكى كانديدات سايلاۋعا جىبەرىلەدى. ودان ءارى سول ەكەۋى سىنعا تۇسەدى»، - دەدى ورتالىق سايلاۋ كوميسسياسىنىڭ مۇشەسى شاۆكات وتەمىسوۆ.

ونىڭ ايتۋىنشا، ورتالىق سايلاۋ كوميسسياسى قازاقستاننىڭ قولدانىستاعى زاڭناماسى اياسىندا جۇمىس ىستەيدى.

«ءبىز زاڭ شىعارۋشى ورگان ەمەسپىز. ياعني، ءبىزدىڭ پارلامەنت وسىنداي زاڭ قابىلداسا، دەمەك ءبىز وعان سۇيەنۋىمىز قاجەت. ال بارلىق كانديداتقا قارسى شىققانداردىڭ داۋسى نەگە ەسكەرىلمەيتىنىنە كەلەتىن بولساق، بۇل - ازاماتتاردىڭ ءوز قالاۋىن ءبىلدىرۋ مۇمكىندىگى، داۋىس بەرۋشىنىڭ كانديداتتارعا دەگەن قارىم- قاتىناسى»، - دەيدى ول.

ەسكە سالا كەتسەك، 20- قاراشادا بولاتىن پرەزيدەنت سايلاۋى بيۋللەتەندەرىندە «بارلىعىنا قارسىمىن» گرافاسى بولادى. ياعني سايلاۋشىلار بارلىق كانديداتقا قارسى داۋىس بەرە الادى.

بۇعان دەيىن ق ر پرەزيدەنتى سايلاۋىنا قاتىساتىن كانديداتتارعا قول جيناۋ پاراعىن بەرۋ ۋاقىتىنىڭ قىسقارعانىن حابارلاعان ەدىك.

اۆتور

داۋلەت ىزتىلەۋ