قىتايدا جوعارى قالىڭمال جاستاردىڭ ۋاقتىلى ۇيلەنۋىنە كەدەرگى بولىپ وتىر

بەيجىڭ. قازاقپارات - قىتاي بيلىگى قىمبات قالىڭمال مەن ۇيلەنۋ تويلارىن ءسان-سالتاناتپەن وتكىزۋگە قارسى كۇرەس ناۋقانىن باستادى.

ناۋقان 2023 -جىلدىڭ جەلتوقسان ايىنا دەيىن جالعاسادى. بۇل تۋرالى قىتاي حالىق رەسپۋبليكاسىنىڭ اۋىل شارۋاشىلىعى جانە اۋىلدىق ىستەر مينيسترلىگى تاراتقان مالىمدەمەدە ايتىلعان، دەپ حابارلايدى قازاقپارات.

ناۋقان اۋىل تۇرعىندارى ءۇشىن ۇيلەنۋ تويلارى، بانكەتتەر مەن قۇدا ءتۇسۋ سىيلىقتارىن ۇيىمداستىرۋعا جۇمسالاتىن شىعىندى ازايتۋدى كوزدەيدى.

كۇيەۋ جىگىت وتباسىنىڭ قالىڭدىق ءۇشىن وتەيتىن قۇنى كوبىنە شامادان تىس سوماعا جەتىپ، اسىرەسە اۋىلدا تۇراتىن قىتاي وتباسىلارىنا اۋىر جۇك ءتۇسىرىپ وتىر.

«جۋنگو جيباو» باسىلىمىنىڭ جازۋىنشا، گانسۋ پروۆينسياسىنىڭ (سولتۇستىك- باتىس قىتاي) جەننين ۋەزىنەن كەلگەن بولاشاق كۇيەۋ جىگىت ءساۋىر ايىندا جەرگىلىكتى اكىمشىلىككە قالىڭمالدىڭ قىمباتتاۋىن تومەندەتۋ شارالارىن قولدانۋدى سۇراعان.

ول باسىنا تۇسكەن جايتتى بايانداپ، بولاشاق جارىنىڭ اتا-اناسى قالىڭدىق ءۇشىن شامامەن 45 مىڭ دوللار اقشا تالاپ ەتكەندىكتەن ەكەۋى قوسىلا الماعانىن ايتتى.

جەننين ۋەزىنىڭ اكىمشىلىگى بۇعان جاۋاپ رەتىندە اۋىلدىق جەردە قالىڭمالدى 11 مىڭ دوللاردان اسىرماۋ كەرەكتىگىن ەسكەرتىپ حابارلاندىرۋ جاريالادى.

«حۋانچيۋ شيباو» باسىلىمى 2021 -جىلى قىتايدا نەكە قيعاندار سانى 2003 -جىلعى دەڭگەيگە دەيىن تومەندەگەنىن جازدى. وتكەن جىلى قىتايدا نەكەسىن تەك 7,64 ميلليون ادام تىركەگەن.

سوڭعى جىلدارى قىتايدا نەكە جاسىنداعىلار سانى ازايىپ، كوبىنە كەش ۇيلەنگەندەر قاتارى كوبەيىپ كەلەدى.

قىتاي دەموگرافتارى نەكە تىركەۋدىڭ ازايۋى ەلدەگى تۋۋ كورسەتكىشىنىڭ تومەندەۋىنە اكەلەتىنىن ەسكەرتىپ وتىر.

اۆتور زارينا تۋعانبايەۆا