زەلەنسكي رەسەيلىكتەردى نارازىلىققا شىعۋعا، قاشۋعا نەمەسە ۋكراين اسكەرىنە بەرىلۋگە ۇندەدى
ۋكراينا پرەزيدەنتى موبيليزاتسيانى رەسەي بيلىگىنىڭ «ونداعان جىلدار بويى وزگە ەلدىڭ جەرىن جاۋلاپ الۋعا دايىنداعان كادرلىق ارمياسىنىڭ شىداس بەرمەي، توز-توزى شىققانىن اشىق مويىنداۋى» دەپ اتادى.
ونىڭ ايتۋىنشا، ۋكرايناداعى سوعىس رەسەيلىكتەر ءۇشىن ەندىگارى ينتەرنەت نەمەسە تەلەديداردان كورەتىن نارسە ەمەس.
«نەلىكتەن داعىستاندىق نەمەسە وزگە كەز كەلگەن ازامات حاركوۆ نەمەسە دونەتسك تۇبىندە وپات بولۋى ءتيىس؟ رەسەيدەگى ءبىر ادام بارلىق ازاماتتىڭ اتىنان شەشىم قابىلدادى. ول سولاي ىستەگىسى كەلەدى. سىزدەر وسى قىلمىس، ادام ءولتىرۋ مەن ۋكراينداردى ازاپتاۋ قىلمىسىنا اتسالىسىپ وتىرسىزدار. سەبەبى ءسىز ۇندەمەدىڭىز. ۇندەمەي وتىرسىز. قازىر تاڭداۋ جاسايتىن ۋاقىت كەلدى» دەدى ۋكراينا پرەزيدەنتى.
زەلەنسكي رەسەيلىكتەردى نارازىلىققا شىعىپ كۇرەسۋگە، قاشۋعا نەمەسە ۋكرايناعا تۇتقىن رەتىندە بەرىلۋگە شاقىردى.
رەسەي باسشىسى ۆلاديمير پۋتين 21- قىركۇيەكتە ەلدە ءىشىنارا موبيليزاتسيا جاريالاپ، اسكەرگە زاپاستاعى اسكەريلەر، قارۋلى كۇشتەر قاتارىندا بۇرىن قىزمەت ەتكەندەر، تاجىريبەسى بار اسكەري ماماندار شاقىرىلاتىنىن ايتقان. قورعانىس ءمينيسترى سەرگەي شويگۋ موبيليزاتسيا جارلىعى اياسىندا 300 مىڭداي ادام اسكەرگە تارتىلاتىنىن مالىمدەگەن.
21- قىركۇيەكتە رەسەيدىڭ 38 قالاسىندا موبيليزاتسياعا قارسى نارازىلىق ءوتىپ، مىڭ جارىمعا جۋىق ادام ۇستالعان. ۇستالعانداردىڭ كەيبىرىنە پوليتسيا بولىمىندە اسكەري كوميسسيارياتقا شاقىرۋ تاپسىرىلعان.
رەسەيمەن كورشى ەلدەر شەكاراسىندا، ونىڭ ىشىندە قازاق-ورىس شەكاراسىندا دا كولىك كەپتەلىسى پايدا بولدى. بۇعان قوسا، ۆيزاسىز ەلدەرگە ۇشاتىن رەيستەرگە بيلەتتەر دە تاۋسىلعانى حابارلاندى. اسكەري كوميسسارياتتان قاشقان رەسەيلىكتەر باسقا ەلدەرگە كەتىپ جاتىر.
«ازاتتىق»
