بۇكىل قازاقتى جىلاتقان «جەتىمدەر» فيلمىنىڭ اكتەرلەرى قازىر قايدا ءجۇر؟
سونداعى كىشكەنتاي اكتەرلەر ەر جەتىپ قالعان. ولار قازىر قايدا ءجۇر؟
Massaget.kz ءتىلشىسى ىزدەپ كوردى.
«جەتىمدەر» نە تۋرالى ەدى؟
ۇمىتىپ قالعاندارىڭىز بولسا، فيلم سيۋجەتىن قىسقاشا ەسكە تۇسىرە كەتەيىك. ارمان مەن ارۋجاننىڭ اتا-اناسى جول اپاتىنان قازا تابادى. جەتىم قالعان ەكەۋىن ساندۋعاش دەگەن اپكەسى باۋىرىنا باسادى. دەگەنمەن ساندۋعاشتىڭ كۇيەۋىنە اسىراندى ەكى بالا ۇنامايدى، ەكەۋىن دە ۇيدەن قۋىپ شىققىسى كەلەدى.
ارمان مەن ارۋجاننىڭ ۇيدەن قاشىپ كەتۋدەن باسقا امالى بولمايدى. ءسويتىپ، ەكى كىشكەنتاي بالا قىستىڭ قاقاعان ايازىندا ۇيدەن قاشىپ كەتەدى.
بۇل فيلمدى رەجيسسەر ەركىن راقىشيەۆ تۇسىرگەن. «برود» سايتىنىڭ مالىمەتىنشە، بۇل فيلم Qazaqstan تەلەارناسىنىڭ تاپسىرىسىمەن تۇسىرىلگەن. فيلم كينوتەاترعا شىققاننان كەيىن انشلاگ بولعان. ءبىراق ارتىنشا فيلمنىڭ پيراتتىق ديسكتەگى نۇسقالارى شىعىپ كەتكەن ەكەن.
فيلمدە باستى رولدەردىڭ ءبىرىن مەرۋەرت قاسىمبەك وينادى. قازىر جاسى 24 تە.
ول «جەتىمدەردەن» بولەك راقىشيەۆتىڭ «جارالى سەزىم»، «مەنىڭ دە اتىم قوجا»، «كەش كەلگەن ماحاببات» فيلمدەرىنە تۇسكەن. كەيىنگى جىلدارى ۇلكەن ەكرانداردان كورىنبەي كەتتى.
فيلم كادرى
جاس اكتريساعا باسقا دا رەجيسسەرلەردەن فيلمگە تۇسۋگە ۇسىنىستار بولىپتى. الايدا وعان ۇسىنىلعان فيلمدەر كوبىنە تراگەديا، سەناريى اۋىر بولعاندىقتان ونىڭ اتا-اناسى تۇسۋگە رۇقسات بەرمەگەن ەكەن.
سۇحباتتارىنىڭ بىرىندە شەت تىلدەرىن مەڭگەرىپ جاتقانىن، ءتىل سالاسىن تاڭداعانىن ايتقان.
ال فيلمدە ارماندى نۇرجان رۇستەنوۆ سومداعان. جەلىدە رۇستەنوۆ تۋرالى ەشقانداي اقپارات جوق. تەك ول كەزىندە «كوكسەرەكتەگى» قۇرماشتىڭ رولىندە ويناعان قامبار ءۋاليدىڭ بالاسى ەكەنى ايتىلادى.
فيلم كادرى
فيلمدە ەكى بالانى قامقورلىعىنا العان ساندۋعاشتىڭ رولىندە گۇلشات تۇتوۆا وينادى.
«جەتىمدەر» مەنى حالىققا تانىتقان، جۇلدىزىمدى جاققان فيلم دەپ ايتا الامىن. نەگىزى، فيلمنىڭ رەجيسسەرى پروفەسسيونال مامان ەمەس. ءبىراق، كورەرمەن فيلمدى جاقسى قابىلدادى. «جەتىمدەردىڭ» جارىققا شىققانىنا 11 جىلدان اسىپ بارادى. مەنى كورگەن ادامدار ءالى كۇنگە دەيىن «سەن جەتىمدەردەگى ساندۋعاش ەمەسسىڭ بە؟» دەپ تانىپ جاتادى. ءتىپتى، ەر ازاماتتاردىڭ ءوزى «راقمەت سىزگە، بۇل مەنىڭ ءومىربايانىم، تاعدىرىم عوي، ءسىز مەنىڭ انامسىز» دەپ جىلاپ، العىستارىن ايتقان كەزدەر ءجيى بولدى. بۇنداي ساتتە بويىڭدى ەرەكشە سەزىم بيلەيدى، - دەگەن ەدى اكتريسا Massaget.kz تىلشىسىنە بەرگەن سۇحباتىندا.
50 جاستاعى گۇلشات تۇتوۆا - اۋەزوۆ اتىنداعى قازاق ۇلتتىق اكادەميالىق دراما تەاترىنىڭ اكتريساسى.
ودان بولەك، فيلمدەرگە دە ءتۇسىپ ءجۇر. «جەتىمدەردەن» باسقا «ءبىرجان سال»، «ءسۇيىنشى»، «اكەم ەكەۋمىز»، «نەسيەگە ماحاببات»، «ماڭگى ءومىر سۇرگىڭ كەلسە»، «استاناعا كوكتەم كەش كەلەدى»، «ءۇمىتىڭدى ۇزبە»، «تۇرار رىسقۇلوۆ»، «47 بالانىڭ اناسى»، «امانات»، «ءوز ءۇيىم»، «ءبىر كەم دۇنيە» جانە تاعى دا باسقا فيلمدەرگە ءتۇسىپتى. بۇگىندە ول «قۇرمەت» وردەنىنىڭ يەگەرى اتانعان.
