ستۋدەنتتەردى پرەزيدەنت سايلاۋىنا قاتىسۋعا ماجبۇرلەۋگە تىيىم سالىنادى - عىلىم ءمينيسترى

استانا. قازاقپارات – ق ر عىلىم جانە جوعارى ءبىلىم ءمينيسترى ساياسات نۇربەك ستۋدەنتتەردى كەلە جاتقان پرەزيدەنت سايلاۋىنا قاتىسۋعا ماجبۇرلەۋ تۋرالى سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«2019-جىلى ۋنيۆەرسيتەت باسشىلىقتارى ستۋدەنتتەردى پرەزيدەنت سايلاۋىنا قاتىسۋعا ماجبۇرلەگەنى ايتىلعان بولاتىن. ودان بولەك، ستۋدەنتتەرگە اقى تولەپ، ولاردى ۇگىت-ناسيحات جۇمىستارىنا جۇمىلدىرعان. بيىل مۇنداي ارەكەتتەرگە جول بەرىلە مە؟ ستۋدەنتتەر ۋنيۆەرسيتەت اكىمشىلىگى تاراپىنان وسىنداي قىسىمعا ۇشىراسا، قايدا حابارلاسا الادى؟»، - دەگەن سۇراق قويىلدى مينيسترگە ورتالىق كوممۋنيكاتسيالار قىزمەتىندە.

«بىرىنشىدەن، ءبىز جاڭا ادىلەتتى قازاقستاندى قۇرىپ جاتىرمىز. پرەزيدەنت ونداي ارەكەتتەردى وتە قاتاڭ باقىلاپ، تىيىم سالادى. ءبىزدىڭ مينيسترلىك تاراپىنان ۇيىمداستىرىلعان ارنايى ارەكەتتەر بولمايدى. تاعى دا مىنانداي جۇيەلى شەشىمدى تاپتىق، ەندى ءمينيستردىڭ جانىندا ستۋدەنتتەردىڭ قۇقىقتارىن قورعايتىن ارنايى ومبۋدسمەن بولادى. ول كوپتەگەن ستۋدەنتتەرگە تانىمال، بەلسەندى ازاماتىمىز - ايسۇلۋ ەرنيازوۆا. رەسمي تۇردە مينيسترلىكتە شتاتتىق كەستە بەكىتىلمەدى، كەلەسى ايدىڭ باسىندا بەكىتۋدى جوسپارلاپ وتىرمىز، سودان كەيىن رەسمي تۇردە حابارلايمىز. ەندى كەز كەلگەن ج و و ستۋدەنتى مينيستر جانىنداعى ارنايى وكىلەتتى ۋاكىلگە جۇگىنە الادى»، - دەپ جاۋاپ بەردى ساياسات نۇربەك.

بۇعان دەيىن عىلىم جانە جوعارى ءبىلىم ءمينيسترى ءوز بالالارىنىڭ قايدا ءبىلىم الىپ جاتقانى تۋرالى جۋرناليستەر سۇراعىنا جاۋاپ بەرگەن ەدى.

سونىمەن بىرگە، 2500 قازاقستاندىق ستۋدەنت رەسەي مەن ۋكراينادان وتاندىق ج و و- لارعا اۋىسقان.

ودان بولەك، ساياسات نۇربەك ستۋدەنتتەرگە جاتاقحانا تاپشىلىعى قالاي شەشىلەتىنىن تۇسىندىرگەن ەدى.