ساياسات نۇربەك بالالارىنىڭ قايدا وقىپ جاتقانىن ايتتى
«بالالارىم جازدا ەلگە ورالدى. ولار 4 جىلدان بەرى سولتۇستىك كيپردە بريتاندىق جەكە مەكتەپتە وقىپ جاتىر. ونداعى ءبىلىم وتە ساپالى جانە ءبىزدىڭ جەكە مەكتەپتەرمەن سالىستىرعاندا اناعۇرلىم ارزان. ءبىز بالالارمەن بۇل تاقىرىپتا بايىپپەن سويلەستىك، ولار ايتارلىقتاي ەسەيگەن. شەتەلدىك مەكتەپتەردىڭ ءبىر جاقسىسى - بالالاردى دەربەس بولۋعا جانە سىندارلى ويلاۋعا ۇيرەتەدى. بالالارىم ءوز تاڭداۋىن جاسادى، ولاردىڭ تاڭداۋىنا قۇرمەتپەن قاراۋىم كەرەك»، - دەپ جاۋاپ بەردى مينيستر ورتالىق كوممۋنيكاتسيالار قىزمەتىندە جۋرناليست سۇراعىنا.
س. نۇربەكتىڭ ايتۋىنشا، بالالارى كيپردە ءبىلىم الۋدى جالعاستىرۋدى ۇيعارعان.
«مەن دە بالالارىمنىڭ تاڭداۋىن قۇرمەتتەپ، ولاردىڭ شەشىمىمەن كەلىستىم. قازىر بارلىق كۇشىمدى، ۋاقىتىمدى، ەنەرگيامدى جوعارى ءبىلىم مەن ۋنيۆەرسيتەت عىلىمىنىڭ ماسەلەلەرىنە ارناپ جاتىرمىن. سوندىقتان، مەنىڭ جانە بالالارىمنىڭ پىكىرىن قۇرمەتتەۋدى سۇرايمىن. كاسىبي قىزمەتىمە بايلانىستى كەز كەلگەن ديالوگقا، كەز كەلگەن سۇراققا، سىن- ەسكەرتپەلەر مەن اقىل- كەڭەسكە اشىقپىن. كەز كەلگەن تىلشىمەن جەكە كەزدەسىپ، كاسىبي تۇرعىدا سۇحباتتاسا الامىن. سوندىقتان بۇل تاقىرىپتى جابۋدى ۇسىنامىن»، - دەدى ساياسات نۇربەك.
بۇعان دەيىن عىلىم ءمينيسترى بالالارىن نەگە شەتەلدە وقىتقانىن ءتۇسىندىرىپ، 26-ماۋسىم كۇنى بالالارىن ەلگە اكەلەتىنىن ايتقان.
