پرەزيدەنتتەر قانداي كولىكپەن جۇرەدى؟

استانا. قازاقپارات - مەملەكەت باسشىلارى قانداي كولىكپەن جۇرەدى؟ جەلىدەگىلەر تاياۋدا قازاقستانعا كەلگەن ق ح ر ءتوراعاسى شي جينپيڭنىڭ كولىگىن تالقىلاعان ەدى.

Massaget.kz ءتىلشىسى پرەزيدەنتتەردىڭ كولىكتەرى قانداي ەكەنىن ىزدەپ كوردى.

شي جينپيڭ

قىتاي باسشىسى شي جينپيڭنىڭ كولىگىنەن باستايىق. ول تاياۋدا قازاقستانعا رەسمي ساپارمەن كەلگەن. سوندا قىتاي باسشىسى اقورداعا Hongqi N701 ليمۋزينىمەن بارعان ەدى.

ب ا ق مالىمەتىنشە، قىتاي پرەزيدەنتى 1-شىلدەدە گونكونگقا ساپارى كەزىندە وسىنداي كولىكپەن جۇرگەن.

شەتەلدىك ب ا ق- تا قىتايلىق كولىكتىڭ كود اتاۋى - N701 ەكەنى اتاپ ءوتىلدى. بۇل ۇكىمەتتىك ليمۋزيندەردىڭ سيپاتتامالارى ادەتتە مەملەكەتتىك قۇپيا سانالادى.

Car News China مالىمەتىنشە، بۇل كولىكتىڭ ۇزىندىعى بەس مەتردەن اسادى. كولىكتىڭ ارتقى ەسىكتەرى الدىڭعىعا قاراعاندا ۇزىنىراق.

دجو بايدەن

Supercar Blondie مالىمەتىنشە، امەريكالىق ءداستۇر بويىنشا، پرەزيدەنت بيلىككە كەلگەن سوڭ ارنايى جاسالعان بىرەگەي كولىك الادى.

ونىڭ بىرەگەيلىگى نەدە دەسەڭىز، ءبىرىنشى كەزەكتە - قورعانىسى. كولىك تەمىر مەن كەراميكادان جاسالعان 20 سانيمەترلىك برونمەن قورعالعان. اۆتوكولىكتىڭ سالونى تولىعىمەن تىعىزدالعان جانە اۆتونوم وتتەگىمەن قامتاماسىز ەتىلگەن. ءتىپتى ءورت ءسوندىرۋ جۇيەلەرى دە بار. تاعى ءبىر ەرەكشەلىگى - سالوندا پرەزيدەنت ءۇشىن قان قورى، دەفيبريللياتور دا بولادى ەكەن.

پرەزيدەنت كورتەجىندە 50 كولىك بولادى، سونىڭ ەكەۋى - ءدال وسىنداي ليمۋزين. ءبىرى بۇزىلىپ قالسا، پرەزيدەنت ەكىنشىسىنە وتىرادى. ودان بولەك، بىرەۋ قاستاندىق ويلاسا، دجو بايدەن ناقتى قاي كولىكتە كەلە جاتقانىن بىلمەيدى.

پرەزيدەنت ليمۋزينى Cadillac 1 نەمەسە The Beast («جىرتقىش») دەپ اتالادى ەكەن.

ۆلاديمير پۋتين

ال رەسەي پرەزيدەنتى ۆلاديمير پۋتيننىڭ كولىگى - Aurus Senat. بۇل كولىك پۋتينگە ارنايى جاسالعان. Aurus Senat كولىگىنىڭ قورعانىسى جوعارى دەڭگەيدە. ول سالونداعى ادامدى اۆتومات، پۋلەمەت جانە سنايپەر ۆينتوۆكاسىنان اتىلعان وقتان دا قورعايدى. كولىك سۋ استىندا ءۇش ساعاتتان اسا تۇرا الادى.

بۇل كولىك شىققان كەزدە ونى Rolls-Royce مودەلىنە قاتتى ۇقساتقاندار بولدى. ول ادەتتەگى سەداننان ءبىر مەترگە ۇزىن.

Motor. ru سايتىنىڭ مالىمەتىنشە، Aurus Senat كەيىن ساتىلىمعا دا شىقتى. باعاسى - 106900000 رۋبل، تەڭگەگە شاققاندا 863 ميلليوننان اسادى. بۇل باعاعا التى Lamborghini Urus كروسسوۆەرىن ساتىپ الۋعا بولاتىنى ايتىلعان.

ەممانۋەل ماكرون

فرانسيا باسشىسى ەممانۋەل ماكرون فرانسيالىق DS-7 كومپانياسىنىڭ كولىگىمەن جۇرەدى. تەك كولىكتى جاڭا نۇسقاسىنا اۋىستىرىپ وتىرادى. بيىل جازدا دا ول پرەزيدەنتتىڭ اۆتوپاركىن جاڭارتتى. ەندى ول DS 7 Elysee جاڭارتىلعان نۇسقاسىمەن جۇرەدى.

فرانسۋز باسشىسىنىڭ كولىگى اسا قىمبات ەمەس، قاراپايىم كروسسوۆەر. تەك باسقالارىنا قاراعاندا سالونى ۇلكەندەۋ جانە قاۋىپسىزدەۋ.

ماكرون مىنەتىن كولىكتىڭ شاناعى بروندالعان، ارتقى جاعىندا ورتاسى بولىنگەن ەكى كرەسلو تۇرادى.

كولىك پرەزيدەنت ءۇشىن جاقسارتىلعان، سوندىقتان ءدال باعاسىن ايتۋ قيىن. ءبىراق DS 7 Elysee ستاندارت بازاسى 60 مىڭ دوللاردان باستالادى.

كيم چەن ىن

سولتۇستىك كورەيا باسشىسى كيم چەن ىن قىمبات Mercedes-Maybach Pullman Guard كولىگىمەن جۇرەدى. ول كولىككە زاماناۋي قورعانىس جۇيەسى ورناتىلعان. كولىككە وق وتپەيدى.

كيم چەن ىن ا ق ش-قا، ۆلاديۆوستوكقا ساپارى كەزىندە ءدال وسى Mercedes-Maybach Pullman Guard-پەن ءجۇرىپتى.

ءبىر قىزىعى، Associated Press مالىمەتىنشە، بۇل كولىكتى شىعاراتىن گەرمانيالىق Daimler كومپانياسى كيم چەن ىنعا ماشينا قالاي تاپ بولعانىن بىلمەيدى. سەبەبى كومپانيا سولتۇستىك كورەيامەن 15 جىلدان اسا ۋاقىت بويى بيزنەس جۇرگىزبەيدى.

III چارلز

جاقىندا ۇلى بريتانيا پاتشاسى بولىپ تاققا وتىرعان III چارلزدىڭ گاراجىندا Jaguar، Aston Martin كولىگى كوپ. وعان سپورتكارلار مەن كابريولەتتەر ۇنايدى ەكەن.

ال پاتشا بولعاننان كەيىنگى العاشقى ساپارىندا 1977 -جىلى شىققان Rolls-Royce Phantom VI كولىگىمەن ءجۇرىپتى. Rolls-Royce-پەن ول بۋكينگەم سارايىنا كەلگەن.

ليمۋزين، نەگىزى، ونىڭ اناسى II ەليزاۆەتاعا تاقتاعى 25 جىلدىعىنا وراي بەرىلىپ، ۇزاق ۋاقىت كورولدىكتىڭ سالتاناتتى كولىگى بولعان.

دجاسيندا اردەرن

جاڭا زەلانديا پرەمەر- ءمينيسترى دجاسيندا اردەرن ەل ىشىندە Hyundai Ioniq Electric ەلەكتركارىمەن جۇرەدى.

الدىڭعى جەتەكتى ماشينا ارنايى قورعانىس قۇرىلعىلارىمەن جابدىقتالماعان. پرەمەر- مينيستر ستاندارت جيناقتاعى كولىكتى تاڭداپتى.

ەلەكتركاردىڭ پايداسى قورشاعان ورتاعا زيان كەلتىرمەيدى. ونىڭ باعاسى 44 مىڭ دوللار ەكەن.

اقپارات دەرەككوزى: https://massaget.kz/basty-zhaalytar-438/72326/