باس باپكەر فۋتبولدان قازاقستان قۇراماسىنىڭ جەڭىسىنە قاتىستى پىكىر ءبىلدىردى
ەسكە سالساق، ەل قۇراماسى 22 - قىركۇيەكتە ءوز الاڭىندا بەلارۋستى ءسۇرىندىردى.
اتالعان جەڭىستەن كەيىن قازاقستان پرەزيدەنتى قاسىم- جومارت توقايەۆ قۇتتىقتاۋ جەدەلحاتىن جولدادى.
وسىلايشا قازاقستاندىق فۋتبولشىلار ءبىر تۋرىن بۇرىن ب ديۆيزيونىنا بەرىلگەن جولداماعا يە بولدى.
«بۇگىنگى جەڭىس وڭايلىقپەن كەلگەن جوق. وعان جانكۇيەرلەر دە ۇلكەن ۇلەس قوستى. ەلىمىزدىڭ بارلىق وڭىرىنە بارعاندا حالىقتىڭ قۇراما ويىندارىنا ريزاشىلىعىن بايقادىم. سوندىقتان بارشا جانكۇيەرلەرگە العىس ايتامىن. ولاردىڭ تاراپىنان بۇگىنگى ويىندا دا قولداۋ ەرەكشە بولدى. جانكۇيەرلەر ستاديونعا كوپ جينالدى. جانكۇيەرلەردىڭ ۇلكەن قولداۋى ەكىنشى گولدىڭ سوعىلۋىنا تىكەلەي اسەر ەتتى. فۋتبولشىلار كەزدەسۋ سوڭىنا دەيىن قارقىنىن باسەڭدەتكەن جوق»، - دەدى ماگومەد ادييەۆ.
سونداي- اق، بەلارۋس قۇراماسىنىڭ باس باپكەرى گەورگي كوندراتيەۆ قازاقستان فۋتبولشىلارىنىڭ جەڭىسىن جوعارى باعالاپ، لەبىزىن ءبىلدىردى.
«قازاقستاندىق فۋتبولشىلاردى بۇگىنگى جەڭىس ارقىلى ب ديۆيزيونىنا جولداما الۋىمەن قۇتتىقتايمىن. ولاردىڭ اتالعان كەزدەسۋگە وتە جاقسى دايىندالعانى بايقالدى. شابۋىلعا كوبىرەك شىعىپ، قارقىندى ويىن كورسەتتى. كەزدەسۋ بارىسىندا شاكىرتتەرىم قارسىلاستارىمەن ءوزارا باسەكە بارىسىندا ورەسكەل قاتەلىكتەرگە جول بەردى. ەكىنشى كەزەڭدە ولاردىڭ تاراپىنان جيناقى قيمىل كورە العان جوقپىن. قازىر قاي ەلدە دە فۋتبول دامىپ جاتىر. سول سەبەپتى سىزدەردىڭ قۇرامالارىڭىز بۇل باعىتتا دۇرىس جولدا كەلە جاتىر دەپ ەسەپتەيمىن»، - دەدى ول.
اۆتور
ءادىلجان ۇمبەت
