استانادا حالىقارالىق جوعارى ءبىلىم كورمەسى ءوتتى
كورمەدە قازاقستاندىق تالاپكەرلەرگە ءبىلىم باعدارلامالارىن ۇسىناتىن ەلىمىزدىڭ ۇزدىك ج و و- لارى مەن ج و و- عا جولداما الاتىن وقۋشىلار جينالدى، دەپ حابارلايدى قازاقپارات ءتىلشىسى.
تالاپكەرلەرگە ارنالعان كورمەدە الەمنىڭ 30 ەلىنەن 60 قا جۋىق جوعارى وقۋ ورىندارى ءبىلىم بەرۋ باعدارلامالارىن ۇسىندى.
«كورمە ۇيىمداستىرۋشىلارىنا ەرەكشە العىسىمىزدى ايتامىز. بۇل - مەكتەپ وقۋشىلارى، كوللەدج تۇلەكتەرى ءۇشىن ۇلكەن مۇمكىندىك. كورمە 2017 -جىلدان بەرى ۇيىمداستىرىلىپ كەلەدى. بيىل كورمەگە 10 مىڭعا جۋىق تۇلەك قاتىسىپ جاتىر»، - دەدى استانا قالاسى ءبىلىم باسقارماسىنىڭ باسشىسى قاسىمحان سەنعازيەۆ.
شارا بارىسىندا ج و و وكىلدەرى وزدەرىنىڭ ءبىلىم باعدارلامالارى جانە قازاقستاندىق تۇلەكتەرگە ارنالعان ارتىقشىلىقتار، جەڭىلدىكتەر تۋرالى اڭگىمەلەپ بەردى.
سونداي- اق، تالاپكەرلەرگە جادىنامالار مەن ج و و اتىنان ەستەلىك سىيلىقتار تابىس ەتىلدى.
«حالىقارالىق كورمە پاندەمياعا دەيىن جىل سايىن وفلاين فورماتتا ءوتىپ كەلدى. كارانتين كەزىندە ونلاين ءوتتى. اراعا ەكى جىل سالىپ قايتا قاۋىشىپ وتىرمىز. شەتەلدىك جوعارى وقۋ ورىندارىنا تۇسكىسى كەلەتىن وقۋشىلار سانى كوپ. وسى كورمە ەلوردادان بولەك شىمكەنت پەن الماتىدا ۇيىمداستىرىلادى. جىل سايىن ءبىزدىڭ ورتالىق ارقىلى 5 مىڭنان استام تالاپكەر شەتەلدە وقۋعا تۇسەدى. كوپ تاڭدالاتىن ەل تۇركيا جانە يتاليا. بۇگىنگى كورمەگە ءتۇرلى ەلدەر جوعارى وقۋ ورىندارىنىڭ وكىلدەرى قاتىسىپ وتىر. قاتىسىپ جاتقان وقۋ ورىندارىنىڭ دەنى تەحنيكالىق ماماندىقتاردى وقىتادى. بۇعان دەيىن مەملەكەت باسشىسى ەلىمىزگە تەحنيكالىق مامانداردى دايارلاۋ قاجەتتىگى تۋرالى ايتقان بولاتىن. ودان بولەك، گۋمانيتارلىق جانە مەديتسينالىق جوعارى وقۋ ورىندارىنىڭ وكىلدەرى بار»، - دەيدى «UNIVERO» ءبىلىم بەرۋ ورتالىعىنىڭ باسشىسى ايزادا قويگەلدينوۆا.
ايتا كەتەيىك، «international Education Fair-2022» حالىقارالىق كورمەسىنە ءوز ەلىمىزدەن بولەك، ا ق ش، قىتاي، مالايزيا، يتاليا، چەحيا، پولشا، لاتۆيا، يسپانيا، بەلگيا، بەلارۋس، رەسەيدىڭ جوعارى وقۋ ورىندارىنىڭ وكىلدەرى قاتىستى.
