رەسەي مەن بەلارۋس جۇك تاسىمالداۋشىلارىنىڭ رۇقساتتاما قۇجاتتارىنا قاتىستى مالىمەت بەرىلدى
ءۇشجاقتى كەزدەسۋ بارىسىندا ا. ىدىرىسوۆ رەسەيلىك جانە بەلارۋستىق ارىپتەستەرىنە تىركەمەلى جولمەن ءارى شامادان تىس جۇكتەمەمەن تاسىمالداناتىن جۇكتەردى جەتكىزۋ كەزىندە شەتەلدىك تاسىمالداۋشىلاردا ءتيىستى ۇلگىدەگى ەكى رۇقسات بلانكىسى بولۋى قاجەتتىگى تۋرالى قازاقستاندىق تاراپتىڭ تالابى جايىندا مالىمەت بەردى. ۆيتسە- مينيستر بۇل حالىقارالىق نورما ەكەندىگىن جانە ول قازاقستاندىقتارمەن قوسا، الەمنىڭ بارلىق مەملەكەتتەرىنىڭ جۇك تاسىمالداۋشىلارىنا قولدانىلاتىنىن ايتتى.
ءوزارا تۇسىنىستىك جاعدايىندا وتكەن كەزدەسۋ بارىسىندا تاراپتار وسى باعىتتاعى قارىم- قاتىناستاردى دامىتۋداعى زاماناۋي تەندەنتسيالارعا دا نازار اۋداردى.
جۇكتەردى ءۇشىنشى ەلدەن شامادان تىس جۇكتەمەمەن تاسىمالداۋ كەزىندە شەتەلدىك تاسىمالداۋشىلار تاراپىنان شارتتار جۇيەلى ءارى ءجيى بۇزىلىپ جاتقانى تۋرالى بۇدان بۇرىن حابارلانعان بولاتىن. وسىعان سايكەس، ق ر يندۋستريا جانە ينفراقۇرىلىمدىق دامۋ مينيسترلىگى ق ر سىرتقى ىستەر مينيسترلىگىمەن بىرلەسىپ، ءۇشىنشى ەلدەردەن شامادان تىس جۇكتەمەمەن اكەلىنەتىن تاۋارلارعا رۇقساتتاما بەرۋ جۇيەسىن قولدانۋ ەرەجەسى مەن ونى تاسىمالداۋشىلاردى قاداعالاۋ تۋرالى ەسكەرتپەنى قىزىعۋشىلىق تانىتقان قۇزىرلى ورگاندار مەن شەتەلدىك ۇيىمدارعا جىبەردى.
«قازاقستان رەسپۋبليكاسىنىڭ حالىقارالىق شارتتارى مەن ىشكى زاڭناماسىنا وراي اتالعان جولمەن جۇك تاسىمالىن جۇزەگە اسىرۋ بارىسىندا شەتەلدىك تاسىمالداۋشىدا وزىمەن بىرگە ءتيىستى ۇلگىدەگى ەكى رۇقسات بلانكىسى بولۋى كەرەك. ءبىرىنشى بلانكىنى تاسىمالداۋشىعا شەكارالىق تەرمينالعا دەيىن جۇك جىبەرگەن تاراپ بەرەدى. ال ەكىنشى رۇقسات بلانكىسى تىركەمەلى جولمەن ەنگىزىلگەن جۇكتەردى تەرمينالدا تيەلگەن كەزدە بەرىلەدى. ول رۇقساتتاما قۇجاتى ءتيىستى جۇك قازاقستان اۋماعىنا ەنگەنشە جارامدى بولىپ تابىلادى»، دەلىنگەن قۇجاتتا.
