جەلىدە تاراعان اسپانداعى بەلگىسىز قۇبىلىس نە ەكەنى بەلگىلى بولدى

استانا. قازاقپارات – 21- قىركۇيەكتە كەشكە استانا، قاراعاندى، پاۆلودار، تالدىقورعان جانە باسقا دا ەلدى مەكەندەردە ۇلكەن كومەتاعا ۇقسايتىن بەلگىسىز نىسان بايقالعان.

ەرەكشە قۇبىلىستى ۆيدەوعا ءتۇسىرىپ العان تۇرعىندار ونى بەيمالىم ۇشاتىن نىسان دەپ توپشىلادى، - دەپ حابارلايدى Massaget.kz ءتىلشىسى.

جارىق ساۋلە شاشقان نىسان اۋانى جارىپ ءوتىپ، عارىشقا قاراي ۇشىپ بارا جاتقانداي. ەرەكشە قۇبىلىستى ۇيالى تەلەفوندارىنا ءتۇسىرىپ ۇلگەرگەن قازاقستاندىقتار ونى بوگدە عالامشارلىقتار نەمەسە مەتەوريت بولۋى مۇمكىن دەگەن بولجام جاسادى.

ال جەلى قولدانۋشىلارى جارقىراعان نىساننىڭ شىعۋ تەگى تۋرالى ءارتۇرلى نۇسقانى العا تارتىپ، كوپشىلىگى «بايقوڭىردان» ۇشقان زىمىراننىڭ ءىزى دەگەن قورىتىندىعا كەلگەن.

ر ي ا نوۆوستي مالىمەتىنشە، اسپانداعى جارقىراعان نىسان «بايقوڭىردان» ۇشىرىلعان «سويۋز-2.1 ا» زىمىران تاسىعىش ەكەن، ول حالىقارالىق عارىش ستانسياسىنا بەت العان.