ۇلى دالا جورىعى: شىمكەنت، اقتوبە، ماڭعىستاۋ شاباندوزدارى الدىڭعى ۇشتىكتە كەلەدى
قازاقستاندا العاش رەت رەسپۋبليكالىق «ۇلى دالا جورىعى» ات سپورتى مارافونى ءوتىپ جاتىر. اتالمىش شاراعا اقتوبە وبلىسىنىڭ وكىلدەرى بەلسەندى ات سالىسۋدا.
«ۇلى دالا جورىعى» - بۇل الەمدىك تاجىريبەدە تەڭدەسى جوق جالپى رەسپۋبليكالىق ات سپورتى مارافونى. وندا استانا قالاسى، اقمولا، قاراعاندى، ۇلىتاۋ، قىزىلوردا، تۇركىستان وبلىستارى سەكىلدى ەلدىڭ التى ءوڭىرى قامتىلادى.
جوبانىڭ ماقساتى - قازاقستانمەن تىكەلەي بايلانىسى بار تانىمال برەند جاساۋ، ۇلتتىق مادەنيەتتى حالىقارالىق ارەناعا شىعارۋ، جاستاردى ۇلتتىق مادەنيەت پەن تاريحتى زەردەلەۋگە تارتۋ، سپورتتىق شەبەرلىك پەن تولەرانتتىلىق قۇندىلىقتارىنا تاربيەلەۋ. مارافون وتاندىق تۋريزم مەن ۇلتتىق سپورتتى دامىتۋعا سەرپىن بەرەدى دەپ كۇتىلىپ وتىر.
«قازاقستاننىڭ بارلىق وڭىرىنەن ءجۇز شاباندوز قاتىسىپ جاتقان مارافون 17-قىركۇيەكتە استاناداعى «قازانات» يپپودرومىندا سالتاناتتى تۇردە اشىلدى. مارافونشىلار قىركۇيەكتىڭ 18-29 ارالىعىندا ەلوردادان تۇركىستان قالاسىنا دەيىن 1200-دەن استام شاقىرىمدى ءجۇرىپ وتەدى.
ءۇشىنشى كەزەڭنىڭ قورىتىندىسى بويىنشا شاباندوزدار 300 شاقىرىمدىق مەجەنى ەڭسەردى. كوشباسشىلار ۇشتىگىندە ماڭعىستاۋ وبلىسىنىڭ، شىمكەنت قالاسى مەن اقتوبە وبلىسىنىڭ كوماندالارى بار»، - دەپ جازدى ۆەدومستۆودان.
اقتوبە وبلىسىنىڭ اتىنان جاسۇلان ەلۋبايەۆ، سەيىلعازى ايماعامبەتوۆ، بەكقالي بولاتبەكوۆ، بەيبارىس يتەشوۆ پەن ءاليحان مۇحامبەتوۆ قاتىسۋدا.
اقتوبە وبلىستىق «بايگە» فەدەراتسياسىنىڭ ديرەكتورى، اقتوبە قۇراما كومانداسىنىڭ باسشىسى ازات جۇكەن ات سپورتىمەن اينالىساتىن قاۋىمنىڭ مۇنداي جارىستى 20 -جىل بويى كۇتكەنىن اتاپ ءوتتى.
«ءوزىم 10 جاسىمنان اتقا ءمىنىپ كەلەمىن. 2004 -جىلدان بەرى ءبىز وسىنداي 300-400 شاقىرىمدىق ساپارلارعا شىعىپ، ءتورت اۋداندى ارالادىق. ءبىز وسىنداي مارافونداردى ارماندادىق. جوبا جايىندا بىلگەن بويدا ۇزاق جولعا شىدامدى ەڭ مىقتى، ءتوزىمدى اتتاردى تاڭداپ الدىق. شاباندوزدار - 15 -جىلدان بەرى بايگەلەرگە قاتىسىپ، جەڭىمپاز اتانىپ جۇرگەن جىگىتتەر. مارافونشىلارىمىزدى تەك جەڭىس تۇعىرىنان كورەسىزدەر»، - دەپ ۋادە بەردى ول.
ۇيىمداستىرۋشىلار بارلىعىن ۇساق-تۇيەككە دەيىن قاراستىرعان: مارافونعا قاتىسۋشىلار ۇلى دالانىڭ رۋحىن سەزىنىپ، تۇركىلەردىڭ كيەلى جەرلەرى - جوشى حان، الاش حان كەسەنەلەرىنە زيارات ەتۋ مۇمكىندىگىنە يە بولادى. سونداي- اق، قازاق حاندىعىنىڭ تۇڭعىش استاناسى، تۇركى رۋحانياتىنىڭ بەسىگى سانالاتىن سوزاق قالاسىنا، تۇركىستان قالاسىنا، ازىرەت- سۇلتان كەسەنەسىنە سوعادى.
مارافون- بايگەنىڭ بارلىق كەزەڭىن ەڭسەرگەن كوماندا تۇركىستان قالاسىنا رەكوردتىق قىسقا مەرزىم ىشىندە جەتىپ، «ۇلى دالا ساربازى» اتاعىن يەلەنەدى دە 30 ميلليون تەڭگە كولەمىندەگى باس جۇلدەنى، ال ەكىنشى، ءۇشىنشى ورىنداردى يەلەنگەن كوماندالار 20 ميلليون تەڭگە جانە 15 ميلليون تەڭگە كولەمىندەگى سىياقىنى الادى.
مارافون بايقاۋىنىڭ ۇيىمداستىرۋشىسى - «The Great Steppe Tour» قوعامدىق قورى مەن ۇلتتىق سپورت قاۋىمداستىعى.
