ساياسات تانۋشى مەرزىمىنەن بۇرىن وتەتىن پرەزيدەنت سايلاۋىنىڭ تاريحي ەرەكشەلىگىن اتادى

استانا. قازاقپارات - ساياسات تانۋشى، قوعام قايراتكەرى ءادىل سايلاۋبەك مەرزىمىنەن بۇرىن وتەتىن پرەزيدەنت سايلاۋىنىڭ تاريحي ەرەكشەلىگىن اتادى، دەپ حابارلايدى قازاقپارات ءتىلشىسى.

«مەملەكەت باسشىسى 1-قىركۇيەكتەگى جولداۋىندا سايلاۋ بيىل كۇزدە بولاتىنىن اتاپ وتكەن ەدى. ساياسي تۇرعىدان ساراپتاپ قاراساق، بۇل سايلاۋدىڭ بولاتىنى انىق ەدى. ءدال 20-قاراشاعا ءدوپ كەلۋى پرەزيدەنتتىك سايلاۋ زاڭدىلىقتارىنىڭ ۋاقىت شەڭبەرىنە بايلانىستى دەپ ەسەپتەيمىن. ساياسي پارتيالاردىڭ، باسقا دا بەلسەندىلەردىڭ سايلاۋالدى باعدارلامالارىن پىسىقتاۋىنا، ۇمىتكەرلەردى ءوزارا ىرىكتەۋگە ءبىر اي ۋاقىت بولدى دەپ تۇسىنسە بولادى. ەندى ناقتى ۇمىتكەرلەر ۇسىنىلادى. بۇل مەملەكەتىمىزدىڭ تۇراقتى، الەمدىك شيەلەنىستەرگە دايىن بولۋ ماقساتىندا وسىنداي قارقىندى جۇيە كەرەك بولدى دەپ ويلايمىن»، - دەيدى ساياساتتانۋشى.

ساراپشى قاراشاداعى سايلاۋ الەم قۇبىلىپ تۇرعاندا وتەتىنىنە دە توقتالدى.

«بۇل سايلاۋدىڭ تاريحي ماڭىزى جەڭىمپازى پرەزيدەنت لاۋازىمىندا ءبىر مارتە عانا وتىرا الاتىنىندا. ال جەتى جىلدىق مەرزىم تۇراقتىلىقتىڭ ارقاسىندا رەفورمانى ىسكە اسىرىپ ۇلگەرۋگە مۇمكىندىك بەرەدى»، - دەدى ءادىل سايلاۋبەك.

ەسكە سالايىق، ق ر پرەزيدەنتىنىڭ كەزەكتەن تىس سايلاۋى 20-قاراشادا وتەدى .