قازاقستان بيدايى پاكىستان مەن يرانعا ەكسپورتتالۋى مۇمكىن

استانا. قازاقپارات - پرەمەر- ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ۇكىمەت كۋلۋارىندا جۋرناليستەرگە بيداي ەكسپورتىنىڭ اياسىن كەڭەيتۋ شارالارى تۋرالى مالىمەت بەردى، دەپ حابارلايدى قازاقپارات ءتىلشىسى.

«وزدەرىڭىز بىلەسىزدەر، بىزدە بۇعان دەيىن استىق ەكسپورتىنا تىيىم سالىندى. ءبىراق، ءبىز فەرمەرلەرگە پايدا تابۋعا مۇمكىندىك بەرۋ ءۇشىن ونى الىپ تاستادىق. قاتەلەسپەسەم، 10 -قىركۇيەكتەن باستاپ الىندى. قازىرگى تاڭدا بىزدە استىق جەتكىلىكتى. ونىڭ ۇستىنە، ازىق- تۇلىك كورپوراتسياسى دا ساتىپ الدى. سول سەبەپتى، بيدايعا قاتىستى ەشقانداي قاۋىپ جوق»، - دەگەن مينيستر بيدايدى ەكسپورتتايتىن ەلدەر ءتىزىمى كەڭەيۋى مۇمكىن ەكەنىن ايتتى.

«سامارقاندا بولعان كەزدە پرەزيدەنت پاكىستان جانە يران باسشىلارىمەن كەزدەسۋ وتكىزىپ، ناقتى تاپسىرمالار بەردى. كەشە وسى ەكى ەلمەن جينالىسقا دايىندىق جاسادىق. كەلەسى اپتادا سويلەسەمىز. ول كەزدە استىق جەتكىزۋ عانا ەمەس، كولىك لوگيستيكاسىن كەڭەيتۋ، ساۋدا- ەكونوميكالىق ىنتىماقتاستىعى بويىنشا ۇكىمەتارالىق كوميسسيانىڭ جۇمىسىن وڭتايلاندىرۋ سياقتى كەشەندى ماسەلەلەر تالقىلانادى»، - دەدى سەرىك جۇمانعارين.

ەسكە سالساق، 8- شىلدەدەن باستاپ قازاقستاننان بيداي مەن بيداي ۇنىن سىرتقا اكەتۋگە شەكتەۋلەر ەنگىزىلگەن بولاتىن. اۋىل شارۋاشىلىعى مينيسترلىگى 14- قىركۇيەكتەن باستاپ بيداي پەن ۇن ەكسپورتىنا شەكتەۋلەردى الىپ تاستادى .

اۆتور

ەسىمجان ناقتىباي