ەلوردالىق قالىڭدىقتار ماھىرگە كوبىندە نە سۇرايدى

استانا. قازاقپارات - سوڭعى بىرنەشە ايدا الەۋمەتتىك جەلىلەردە ماھىرگە ءتۇرلى قىمبات سىيلىق سۇراعان قالىڭدىقتاردىڭ ۆيدەولارى تارادى.

وندا كەيبىرى شەتەلدىك ماركالى كولىك سۇراسا، ەندى ءبىرى ءماھىرىن باسپانامەن العىسى كەلەتىنىن مالىمدەگەن. وسى ورايدا، «ازىرەت سۇلتان» مەشىتىنىڭ نايب يمامى باقىتجان وتكەلبايەۆ قازىرگى ەلوردالىق قالىڭدىقتار ماھىرگە كوبىنە نە سۇرايتىنىن جانە ونىڭ بەرۋدىڭ ماڭىزى تۋرالى ايتىپ بەردى.

«پايعامبارىمىزدىڭ: ءماھىردىڭ از بولعانى - ابزالى، دەگەن ءسوزى بار. كوپ جاعدايدا بىزگە كەلەتىن جۇپتار ماھىرگە التىن القا، جۇزىك، سىرعا، بىلەزىك سۇراپ جاتادى. كولىك سۇرايدى كەيبىرەۋلەرى. ءبىراق ولار جاعدايى بار ادامدار. ولاردىڭ الىپ بەرە الاتىنى كورىنىپ تۇرادى. الدىن الا كەلىسىپ كەلەدى نەگىزى قىز بەن جىگىت. سونىمەن قاتار، تەلەفون، تىگىن ماشيناسى، كومپيۋتەر سۇراپ جاتاتىندار بار. كيىم سۇرايتىندار دا كەزدەسەدى. ماسەلەن، كۇن سۋىتا باستاعاندا نەكەسىن قيدىرتاتىن قالىڭدىقتار كوبىنە تون سۇرايدى. اراسىندا ەشتەمە كەرەك ەمەس، تەك جولداسىم ادال بولسا بولدى، دەگەن تالاپ قوياتىندار بولادى. دەگەنمەن ول رۋحاني دۇنيە. ال ءماھىر ماتەريالدىق، قارجىلاي جانە زاتتاي بەرىلەدى. ول رۋحاني دۇنيەگە جاتپايدى»، - دەدى باقىتجان وتكەلبايەۆ.

بۇدان بولەك، «ازىرەت سۇلتان» مەشىتىنىڭ نايب يمامى جالپى ءماھىر بەرۋدىڭ ءمانى مەن ماڭىزدىلىعىنا توقتالدى.

«ءماھىردى بەرۋ - يسلام شاريعاتى بويىنشا مىندەت. بۇل قىزدىڭ قۇقىعىن قورعاۋ بولىپ ەسەپتەلەدى. ياعني، كەپىلدىك. ەگەر ەردىڭ باسىنا قانداي دا ءبىر جاعداي تۇسسە، وندا ايەل ازاماتى سول ءماھىر ارقىلى ءومىرىن ءسۇرىپ، جالعاستىرىپ كەتۋى ءتيىس. ول ايەلدى قورعاۋ ءۇشىن شاريعاتتىڭ قويعان تالاپتارى. قانداي جاعداي بولماسىن، ايەلدە كەپىلدىك زات بولۋى ءتيىس. ونى ايەل قالاسا قايتادان جولداسىنا تابىستاي الادى. سونداي-اق، ونى ءوزىنىڭ اتا-اناسىنا نەمەسە تۋىستارىنا بەرە الادى. وسى ورايدا، ۋاقىتىن كەلىسىپ الۋ ماڭىزدى. ماسەلەن، ۇلكەن ءماھىر سۇرايتىن بولسا، وندا ونى وسىنشاما جىلعا نەمەسە ءومىرىنىڭ سوڭىنا دەيىن الىپ بەرۋگە ۋادەلەسە الادى. اللا ساقتاسىن، ءبىراق اجىراسقانعا دەيىن دە الىپ بەرۋىنە بولادى.

جالپى مەشىتكە كەلگەن كەزدە ءبىز تۇسىندىرەمىز. كەيبىرى ءتىپتى ءماھىردىڭ نە ەكەنىن بىلمەيدى. ەگەر جىگىتتىڭ جاعدايى كەلمەيتىن بولسا، وندا ونى قاراپ، قالىڭدىق ەكەۋىن كەلىستىرىپ، كەڭەس ايتامىز»، - دەپ اتاپ ءوتتى باقىتجان وتكەلبايەۆ.

نايب يمامنىڭ ايتۋىنشا، پايعامبارىمىزدىڭ زامانىندا ءماھىردىڭ ەڭ از قۇنى 10 ديرحام بولعان. بۇل سوماعا ول كەزدە ەكى قوي ساتىپ الۋعا بولاتىن دەسەدى. وسىعان سايكەس، قازىرگى تاڭدا ءماھىردىڭ ەڭ از مولشەرى 2 قويدىڭ قۇنىنان كەم بولماۋى كەرەك. ال ونىڭ ەڭ قىمبات ءارى شەكتى باعاسى جوق.