وليمپيادا مەدالىن كەشىكتىرىپ العان قازاقستاندىق سپورتشىلار
قازاق سپورتى تاريحىندا وليمپيادا مەدالىن ۇزاق ۋاقىتتان كەيىن ءبىراق العان سپورتشىمىز از ەمەس. Massaget.kz ءتىلشىسى جۇلدەسىن كەشىكتىرىپ العان سپورتشىلارىمىز تۋرالى باياندايدى.
داۋلەت شابانباي
بالۋان داۋلەت شابانباي 2012-جىلى لوندونداعى وليمپيادا ويىندارىندا ەركىن كۇرەستەن 120 كەلىگە دەيىنگى سالماقتا بەسىنشى ورىن العان. سول كەزدە وزبەكستاندىق ارتۋر تايمازوۆ التىن، گرۋزين بالۋانى داۆيد مودزماناشۆيلي كۇمىس جۇلدە يەلەنگەن ەدى. ءبىراق 2019-جىلى ەكەۋىنىڭ دە دوپينگ-سىنامالارىن قايتا تەكسەرۋ كەزىندە تىيىم سالىنعان پرەپارات تابىلعان.
وسىلايشا، داۋلەت شابانباي بەسىنشى ورىننان بىردەن ءۇشىنشى ورىنعا كوتەرىلدى. تاياۋدا وعان بەلگرادتاعى الەم چەمپيوناتى كەزىندە وليمپيادانىڭ قولا مەدالى تابىستالدى.
«ءبارى مەنى جەكە قۇتتىقتاعانىنا وتە قۋانىشتىمىن. ءبىزدىڭ سپورتشىلار چەمپيون بولسىن. دايىندالىڭدار، جىگىتتەر!»، - دەدى داۋلەت شابانباي.
اننا نۇرمۇحامبەتوۆا
2012-جىلى لوندوندا بەسىنشى ورىن الىپ، كەيىن مەدال يەلەنگەن تاعى ءبىر سپورتشىمىز - اۋىراتلەت اننا نۇرمۇحامبەتوۆا. ول لوندون وليمپياداسىندا 69 كەلىگە دەيىنگى سالماقتاعى جۇلقا كوتەرۋدە ەڭ اۋىر زىلتەمىردى باعىندىرىپ، ونى ءۇش تورەشى دە ەسەپتەگەن. ءسويتىپ، ءبىرىنشى جاتتىعۋدان سوڭ كوش باستاپ تۇرۋى كەرەك ەدى. الايدا بەلارۋس باپكەرلەرىنىڭ ءبىرى شۋ شىعارىپ، اننا زىلتەمىردى دۇرىس كوتەرمەگەنىن ايتقان. ارتىنشا تورەشىلەر اقىلداسىپ، قازاقستاندىق زىلتەمىرشىنىڭ ناتيجەسىن ەسەپتەمەي تاستاعان ەدى. ءسويتىپ، اننا سەرپە كوتەرۋدە دە ەسەسىن قايتارا الماي، بەسىنشى ورىن الىپ قالعان ەدى.
2016-جىلى قازاندا ادىلەت ورنادى. سەبەبى لوندوندا ءۇشىنشى جانە ءتورتىنشى ورىندى بەلارۋس سپورتشىلارى يەلەنگەن. مارينا شكەرمانكوۆا مەن دينا سازونوۆەتستىڭ قانىنان دوپينگ تابىلدى دا، ەكەۋىنىڭ دە لوندونداعى ناتيجەسى جويىلدى. وسىلايشا، اننا لوندون وليمپياداسىنىڭ قولا جۇلدەگەرى بولىپ شىعا كەلدى.
«ارينە، بۇل ءار سپورتشىنىڭ ومىرىندەگى ماڭىزدى وقيعا. ءبارى بىردەن ءادىل وتكەنى جاقسى ەدى. ءبىراق بىرنەشە جىلدان كەيىن ادىلدىك ورناعانىنا قۋانىشتىمىن»، - دەگەن ەدى اننا Olympic.kz پورتالىنا.
دەنيس ۇلانوۆ
اۋىراتلەت دەنيس ۇلانوۆ 2016-جىلى ريو-دە-جانەيرودا وتكەن وليمپيادادا 85 كەلىگە دەيىنگى سالماقتا ءتورتىنشى ورىن الىپ قالىپ، قاتتى وكىنگەن. سەبەبى ەكى جاتتىعۋ قورىتىندىسى بويىنشا ول 390 كەلىنى ەڭسەرگەن. قولا مەدال العان رۋمىن گابريەل سەنكرىيان دا ءدال وسىنداي كەلىنى كوتەرگەن ەدى، تەك ۇلانوۆتان 200 گرامعا جەڭىلدەۋ بولىپ، جۇلدەنى جۇلىپ اكەتكەن بولاتىن.
ءبىراق سول 2016-جىلى ۇلانوۆ قولا مەدالىن يەلەنە الدى. رۋمىن سپورتشىسىنىڭ قانىندا تەستوستەرون دەڭگەيى كوپ بولىپ، دوپينگ-سىناقتان وتە الماي قالعان. وسىلايشا، 2016-جىلى جەلتوقساندا ۇلانوۆقا ريو وليمپياداسىنىڭ قولا جۇلدەسى بەرىلدى.
ولگا رىپاكوۆا
ولگا رىپاكوۆا ءۇش قارعىپ سەكىرۋدەن 2012-جىلى لوندوندا التىن، 2016-جىلى ريودا قولا مەدال يەلەنگەن. بارلىق مەدالدى جيناۋ ءۇشىن كۇمىس جۇلدە جەتپەي تۇرعان ەدى. وعان بەيجىڭ وليمپياداسىنان 10 جىلدان كەيىن قول جەتكىزدى.
رىپاكوۆا 2008-جىلعى بەيجىڭ وليمپياداسىندا ءتورتىنشى ورىن العان. 2017-جىلى قولا جۇلدەگەر گرەكيالىق حريسوپي ديەۆەتسيدىڭ قانىنان ستانوزول تابىلىپ، بۇل مەدال رىپاكوۆاعا بۇيىرايىن دەپ تۇرعان.
2018-جىلى رەسەيلىك تاتيانا لەبەديەۆادان دا دوپينگ تابىلدى. سوندىقتان ونىڭ كۇمىس مەدالى ولگا رىپاكوۆاعا تابىستالدى.
اللا ۆاجەنينا
رەسەيدە قۇراماعا ىلىگە الماي، 2007-جىلى قازاقستان قۇراماسى ساپىنا اۋىسقان اۋىراتلەت اللا ۆاجەنينا بەيجىڭ وليمپياداسىندا 85 كەلىگە دەيىنگى سالماقتا كۇمىس مەدال جەڭىپ العان ەدى.
سەگىز جىلدان كەيىن بۇل كورسەتكىشى وزگەردى. سول كەزدە «التىن» العان قىتايلىق تساو لەيدەن 2016-جىلى دوپينگ انىقتالدى - ول بوي گورمونىنا قاجەت پرەپاراتتار ىشكەن بولىپ شىقتى.
وسىلايشا، اللا ۆاجەنينا سەگىز جىلدان كەيىن كۇمىسىن التىن جۇلدەگە اۋىستىردى.
نۇرباقىت تەڭىزبايەۆ
قازاقستاندىق بالۋان نۇرباقىت تەڭىزبايەۆ تا بەيجىڭ وليمپياداسىنداعى جۇلدەسىن جاڭارتقان. 2008-جىلى بەيجىڭدە نۇرباقىت 60 كەلىگە دەيىنگى سالماقتا قولا مەدال يەلەنگەن ەدى.
ونى جارتىلاي فينالدا جەڭگەن ازەربايجاندىق ۆيتالي راگيموۆ فينالدا سۇرىنگەن بولاتىن. سەگىز جىلدان كەيىن راگيموۆتىڭ قانىنان تۋرينابول تابىلىپ، 2017-جىلى رەسمي تۇردە جۇلدەسىنەن ايىرىلعان.
سونىڭ ارقاسىندا 2017-جىلى تەڭىزبايەۆقا بەيجىڭ وليمپياداسىنىڭ كۇمىس مەدالى بەرىلدى. ءبىر وكىنىشتىسى، دوپينگ قولدانعان راگيموۆ بولماعاندا، تەڭىزبايەۆ فينالعا شىعىپ، التىن مەدالعا تالاسا الار ەدى.
