سافۋان شايمەردەنوۆ دۇنيەگە كەلگەن امانگەلدى اۋىلىندا ءبىر عانا ءۇي قالعان

سافۋان شايمەردەنوۆتىڭ 100 جىلدىق مەرەيتويى پەتروپاۆلدا «ءسوز زەرگەرى - سافۋان» اتتى شىعارماشىلىق كەشپەن اشىلدى. وعان جازۋشىنىڭ ارىپتەستەرى بەلگىلى قالامگەرلەر، قوعام قايراتكەرلەرى، تۋعان-تۋىستارى قاتىسىپ، ەستەلىكتەرىمەن ءبولىستى. ال نەگىزگى ءىس- شارا ەكىنشى كۇنى سافۋاننىڭ كىندىك قانى تامعان امانگەلدى اۋىلىندا ءوتتى. اق شاڭقان كيىز ۇيلەر تىگىلىپ، ۇلان اسىر توي ۇيىمداستىرىلدى.

مەيماندار جازۋشىنىڭ تۋىپ-وسكەن ۇيىندە بولىپ، «شايمەردەن اۋلەتىنىڭ قاراشاڭىراعى» دەپ جازىلعان مەموريالدىق تاقتانىڭ اشىلۋ راسىمىنە قاتىستى.

«بۇل قاراشاڭىراققا اكەمىز ءتىرى كەزىندە ءسابيت مۇقانوۆ، عابيت مۇسىرەپوۆ تە كەلگەن. وزىمەن قاتارلاس جۇرگەن تاحاۋي احتانوۆ، ءابدىجامىل نۇرپەيىسوۆ سەكىلدى قازاقتىڭ مارعاسقالارىنىڭ ءبارى وسى ۇيدە بولىپ، قاراشاڭىراقتان ءدام تاتتى. سوندىقتان بۇل ءۇيدى ەل كوشىپ كەتسە دە ءبىز بۇزباي ساقتاپ وتىرمىز. اۋىل قايتادان ورنىنا كەلەدى دەپ ويلايمىن. سەبەبى 150 جىلدىعى ءوتىپ جاتقان احمەت بايتۇرسىنوۆتىڭ اۋىلى ەكى رەت جابىلىپ، ەكى رەت قايتادان ورنىنا كەلگەن ەكەن»، - دەيدى سافۋان شايمەردەنوۆتىڭ ۇلى، بەلگىلى جۋرناليست سايىن شايمەردەن.

سافۋان شايمەردەنوۆتىڭ «بولاشاققا جول» اتتى العاشقى رومانى 1953 -جىلى جارىق كوردى. بۇل تۋىندى كەيىن «ينەش» دەگەن اتاۋمەن ورىس تىلىنە اۋدارىلدى. «ءومىر نۇرى» اتتى پوۆەستەر سيكلىنە «مەزگىل»، «قارعاش»، «ءومىر نۇرى»، «يت اشۋى»، «ءماجنۇن تال» اتتى شىعارمالارى كىرگەن. ولار شەتەل تىلدەرىنە الدەنەشە رەت اۋدارىلعان. ءوزى دە اۋدارمامەن اينالىستى. ر. تاگوردىڭ «كۇيرەۋ» رومانىنىڭ اۋدارماسى ءۇشىن 1984 -جىلى قازاقستان جازۋشىلار وداعىنىڭ سىيلىعىن، «اعالاردىڭ الاقانى»، «ادەبي تولقىندار» اتتى كىتاپتارى ءۇشىن 1988 -جىلى رەسپۋبليكانىڭ اباي اتىنداعى مەملەكەتتىك سىيلىعىن الدى.

«سافۋان شايمەردەنوۆ ءبىزدىڭ ۇلتتىق ادەبيەتىمىزدى بيىككە كوتەرگەن كلاسسيىگىمىز عانا ەمەس، ول ۇلتىمىزدىڭ ار-ۇياتىنا اينالعان ۇلكەن ازامات. ول ءبىزدىڭ قانشاما ۇرپاققا ۇلگى بولاتىن ونەگەلى ءىس تىندىرعان قايراتكەر. قازاق جازۋشىسى ەگەر مىقتى بولاتىن بولسا، كوركەم ادەبيەت ارقىلى ۇلتتى تاربيەلەۋ مىندەتىن عانا ەمەس، ول قايراتكەرلىك مىندەتتى دە اتقارادى. سول مىندەتتىڭ بيىگىنەن تابىلعان اعامىز كەشەگى جەلتوقساندا جاستاردى اراشالاپ، رەسپۋبليكانىڭ ەڭ بيىگىندە تۇرعان كىسىلەردىڭ الدىندا ءوزىنىڭ وي تۇجىرىمدارىن ايتتى»، - دەدى ق ر پرەزيدەنتىنىڭ كەڭەسشىسى، ۇلتتىق عىلىم اكادەمياسىنىڭ اكادەميگى باۋىرجان وماروۆ.

1992 -جىلى سافۋان شايمەردەنوۆ حالىق جازۋشىسى قۇرمەتتى اتاعىنا يە بولدى.

فوتو: novoetv.kz

اۆتور اقەركە داۋرەنبەك قىزى