استانادا ماڭدايشالار مەن نۇسقاعىشتاردى اۋىستىرۋ، اقپارات جاڭارتۋ جۇمىسى ءجۇرىپ جاتىر
«قۇرمەتتى قالا تۇرعىندارى مەن قوناقتارى! وزدەرىڭىز بىلەتىندەي، ەل استاناسىنىڭ اتاۋىن نۇر- سۇلتاننان استانا ەتىپ وزگەرتۋ تۋرالى مەملەكەت باسشىسىنىڭ جارلىعى كۇشىنە ەندى. قالادا ماڭدايشالاردى، نۇسقاعىشتاردى، اقپاراتتىق پاننولاردى جانە باسقالارىن اۋىستىرۋ جۇمىسى ءجۇرىپ جاتىر. قۇجات اينالىمى ەلەكتروندى فورماتتا جۇرەتىنىن ەسكەرە وتىرىپ، اقپاراتتىق دەرەكقورلارعا ءتيىستى وزگەرىستەر ەنگىزىلەدى. سول سياقتى اكىمدىكتىڭ، باسقارمالاردىڭ رەسمي رەسۋرستارىندا جانە ۆەدومستۆولىق باعىنىستى ۇيىمداردىڭ سايتتارىندا دا دەرەكتەر جاڭارتىلادى»، - دەپ جازدى اقمارال ولجابايەۆا Facebook پاراقشاسىندا.
ونىڭ ايتۋىنشا، ماڭدايشالاردى، نۇسقاعىشتاردى اۋىستىرۋ، اقپاراتتى جاڭارتۋ جانە باسقا جۇمىستار جوسپارلى تۇردە جۇرگىزىلە بەرمەك.
ادىلەت مينيسترلىگى ءمالىم ەتكەندەي، وسىعان بايلانىستى ەلوردا تۇرعىندارى ءۇشىن قۇجاتتاردى اۋىستىرۋدىڭ ەش قاجەتى جوق، قۇجاتتار ولاردىڭ قولدانۋ مەرزىمى اياقتالعان كەزدە ءوز كەزەگىمەن وزگەرەدى.
