مەملەكەتتىك قۇرىلىم تۇبەگەيلى وزگەرەدى - ءماجىلىس ءتوراعاسى
«بۇگىن ەلىمىزدىڭ بولاشاعىن ايقىندايتىن، مەملەكەتتىك قۇرىلىمدى جاڭاشا قالىپتاستىراتىن وتە ماڭىزدى شەشىم قابىلدادىق. قازاقستان جاڭا ساياسي داۋىرگە قادام باسقالى تۇر. ءبىز سول العاشقى قادامىن باستادىق. بۇعان دەيىن بۇكىلحالىقتىق رەفەرەندۋم ارقىلى قابىلدانعان كونستيتۋتسيالىق رەفورما ساياسي جاڭعىرۋدىڭ نەگىزىن قالادى. ال بۇگىن قابىلدانعان شەشىم سول رەفورمالاردىڭ نۇكتەسىن قويىپ، مەملەكەتىمىزدىڭ جاڭا ساياسي مودەلگە كوشۋىنە جول اشادى»، - دەدى ە. قوشانوۆ پارلامەنت پالاتالارىنىڭ بىرلەسكەن وتىرىسىندا.
وسى ورايدا ول ەلىمىز دەموكراتياعا قاراي نىق قادام باسقانىن اتاپ ءوتتى.
«مەملەكەتتىك قۇرىلىم تۇبەگەيلى وزگەرەدى. بۇل تۇرعىدا مەملەكەت باسشىسى قاسىم- جومارت كەمەل ۇلى توقايەۆتىڭ ماڭايىنا توپتاسىپ، ادىلەتتى قوعام قۇرىپ، ەل بايلىعىنىڭ حالىققا تەڭدەي بولىنۋىنە جاعداي جاساپ، ازاماتتارىمىزدىڭ ءال- اۋقاتىن ارتتىرىپ، بەيبىت ءارى بەرەكەلى ءومىردىڭ ورنىعۋىن قامتاماسىز ەتىپ وتىرمىز»، - دەدى ءماجىلىس ءتوراعاسى.
بۇدان بۇرىن حابارلانعانداي، بۇگىن پارلامەنت پالاتالارىنىڭ بىرلەسكەن وتىرىسىندا «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋ ەنگىزۋ تۋرالى» قازاقستان رەسپۋبليكاسىنىڭ زاڭىن قابىلدادى.
اۆتور
رۋسلان عابباسوۆ
