جاناربەك ءاشىمجان: حالىقتىڭ نەگىزگى تالابى - ەلورداعا استانا اتاۋىن قايتارۋ

«جۇرت نازارىندا تۇرعان تاعى ءبىر ماسەلە - ەلوردانىڭ بۇرىنعى اتاۋىن قايتارۋ. قازاقستان حالقى تۇڭعىش پرەزيدەنتتىڭ مەملەكەت ىرگەسىن بەكىتۋدەگى تاريحي ەڭبەگىن جوققا شىعارمايدى. ءبىر ەلوردانىڭ وزىندە حالىقارالىق اۋەجايدىڭ، بىرنەشە ەسكەرتكىشتىڭ، ساياباقتىڭ، وقۋ ورنىنىڭ ول كىسىنىڭ ەسىمىمەن اتالۋىنىڭ ءوزى قۇرمەتتىڭ بەلگىسى. ال حالىقتىڭ نەگىزگى تالابى - كەزىندە ءوزىنىڭ پارمەنىمەن ەلورداعا بەرىلگەن استانا اتاۋىن قايتارۋ. دەپۋتاتتار سول سەبەپتى سايلاۋشىلاردىڭ ءوتىنىشى نەگىزىندە ارناي باستاما جاسادى»، - دەدى دەپۋتات «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋ ەنگىزۋ تۋرالى» زاڭ جوباسىن تالقىلاۋ بارىسىندا.

وسى ورايدا ول مەملەكەت باسشىسى قاسىم- جومارت توقايەۆ «پىكىر سان الۋان، ءبىراق مەملەكەت جالعىز» دەگەن ويدى ايتقانىن ەسكە سالدى.

«سوندىقتان ەل - ورتاق، جەر - ورتاق، ەلوردا - ورتاق. «بۇگىن - ەرتە بولسا، ەرتەڭ - كەش. اسىعۋ زيان بولسا، كەشىگۋ - قاۋىپتى». ادامزات تاريحى وسىنداي الدى- ارتىن بولجاپ بولماس ساياسي- الەۋمەتتىك، تۋربۋلەنتتى قۇبىلىستاردى باستان كەشۋدە. قازاق قوعامىنىڭ دا باسىنان الاعاي دا بۇلاعاي كەزەڭدەر كوشىپ جاتىر. سونداي كەزەڭدەردە ەلدىڭ كوشىن - ەر تۇزەسە، ادىلەتتى ەردىڭ ءىسىن - ەل جاقتاسا كەرەك. بۇگىنگى قوعام تالقىسىنا سالىنىپ، الۋان پىكىردىڭ كورىگىن قىزدىرعان ماسەلەلەردىڭ قۇقىقتىق تۇرعىدان باعاسى بەرىلۋ ءۇشىن وسى زاڭ جوباسىن قولداۋعا بارشا ارىپتەسىمدى شاقىرامىن»، - دەدى ول.

اۆتور

مارلان جيەمباي