ەلوردا ءماسليحاتى استانا اتاۋىن قايتارۋ ۇسىنىسىن قولدادى
بۇگىن ءماسليحات الەۋمەتتىك جەلىلەردە جانە قوعامدا تالقىلانىپ جاتقان دەپۋتاتتار ۇسىنىسىن قاراۋ بويىنشا قوعامدىق تىڭداۋ وتكىزدى. وندا قوعامدىق كەڭەس مۇشەلەرى ەلورداعا بۇرىنعى اتاۋىن قايتارۋدى قولداعان بولاتىن. ارتىنشا اتالعان ۇسىنىس ءماسليحاتتىڭ كەزەكتەن تىس سەسسياسىندا قارالدى.
«الەمدىك تاجىريبەدە ەل استانالارىنىڭ بۇرىنعى اتاۋلارىن قايتارعان جاعدايلار بار. قازىر ءبىز جاڭا قازاقستانعا اياق باسىپ جاتقاندا، ەلوردانىڭ جاڭا اتاۋى - بۇل سيمۆوليكالىق مانگە يە بولادى. جەرگىلىكتى تۇرعىن رەتىندە مەن باس قالامىزعا استانا اتاۋىن قايتارۋدى قولدايمىن. ونى تەك قازاقستاندا عانا ەمەس، بارشا الەم بىلەدى. بۇل - تانىمال برەند»، - دەدى ماسليحات دەپۋتاتى اسقار سماعۇلوۆ.
باس شاھارعا بۇرىنعى اتاۋىن قايتارۋ ماسەلەسى تالقىلانعان ءماسليحاتتىڭ كەزەكتەن تىس سەسسياسىنا 31 دەپۋتاتتىڭ 25- ءى قاتىستى. سەسسيا قورىتىندىسى بويىنشا دەپۋتاتتار ۇسىنىستى قولداپ، شەشىم قابىلدادى. ەندى قۇجات ۇكىمەت جانىنداعى رەسپۋبليكالىق ونوماستيكا كوميسسياسىنىڭ قاراۋىنا جىبەرىلەدى.
بۇعان دەيىن ءماسليحات حاتشىسى ەرلان كاناليموۆ بۇل پروتسەسس بىرنەشە كەزەڭنەن وتەتىنىن ايتقان بولاتىن.
سونىمەن قاتار، ءماسليحات حاتشىسى ەلوردا اتاۋىن وزگەرتۋگە قاتىستى شىعىندارعا تۇسىنىك بەرگەن بولاتىن. ونىڭ ايتۋىنشا، سيفرلىق قۇجات اينالىمىنا كوشىپ جاتقانىمىزدى ەسكەرسەك، وندا شىعىندار از بولادى.
اۆتور
ءاليحان اسقار
