استانادا «ءومىر اعاشى» مونۋمەنتى بوي كوتەرەدى

الەمدىك جانە ءداستۇرلى دىندەر سەزى اياسىندا قازاقستانداعى ءتۇرلى كونفەسسيالار مەن ۇلتتار اراسىنداعى ىنتىماقتاستىقتى، دوستىق پەن بىرلىكتى بەينەلەيتىن تابيعي- رەكرەاتسيالىق ساياباق تۇجىرىمداماسى دايىندالعان. ەلوردا اكىمدىگىنىڭ قولداۋىمەن جۇزەگە اسىرىلعان جوبا بەيبىتشىلىك جانە كەلىسىم ساياباعى دەپ اتالىپ، ەسىل وزەنىنىڭ بويىنان اشىلدى. بۇگىن سەزد دەلەگاتتارىنىڭ قاتىسۋىمەن ساياباقتا 60-تان استام اعاش وتىرعىزىلدى.

قالا اكىمدىگىنىڭ ۋربانيستيكا ورتالىعىنىڭ مالىمەتىنشە، جوبانىڭ نەگىزگى يدەياسى - «ءومىر اعاشى» مونۋمەنتى. بۇگىندە كۇمبەز تۇرىندەگى ەسكەرتكىشتىڭ قاڭقاسى دايىن، ونىڭ ورتاسىنا جاپىراقتى اعاش، ەمەن وتىرعىزىلعان. اعاش سپيرالمەن جانە ۇيلەسىمدى سۋبۇرقاقپەن قورشالادى.

«اۆتور يدەياسىنا سايكەس، عاسىرلار بويى تامىرى تەرەڭدە جاتقان سۋ مەن ءومىر اعاشى جەر بەتىندەگى تىرشىلىكتىڭ ناقتى بەينەسىن ايشىقتايدى. وسىلايشا، ينستاللياتسيا بارلىق كونفەسسيالاردىڭ كەلىسىمگە، بەيبىتشىلىك پەن دوستىققا شاقىرۋىن بىلدىرەدى. كۇمبەز ءوز كەزەگىندە ءبىر اسپان استىنداعى الەمدى بەينەلەيدى. وندا 4 نەگىزگى نۇكتەنى - وڭتۇستىك، سولتۇستىك، باتىس، شىعىستى بىلدىرەتىن 4 كىرۋ ايماعى بولادى»، - دەلىنگەن ۋربانيستيكا ورتالىعىنىڭ مالىمەتىندە.

كۇمبەز قابىرعالارىندا دۇنيەنىڭ جاراتىلۋىن، قازاقستان تاريحىنداعى وقيعالاردى كورسەتەتىن بەينەلەر، سونداي- اق قازىرگى زامانعا ۇندەۋ رەتىندە ەلىمىزدىڭ اۋماعىندا تابىلعان ايگىلى ەجەلگى جارتاس سۋرەتتەرى - پەتروگليفتەر سالىنادى. اعاشتىڭ اينالاسىنداعى سپيرال اسپاندى (كۇمبەزدى) جانە جەردى (سۋ بەتىن) بايلانىستىرادى، وسىلايشا الەمنىڭ نازىكتىگى تۋرالى يدەيانى جەتكىزەدى.

الەمدىك جانە ءداستۇرلى دىندەر ليدەرلەرىنىڭ VII سەزى دەلەگاتسيالارى باسشىلارىنىڭ سانىنا سايكەس «ءومىر اعاشى» مونۋمەنتىنىڭ اينالاسىنا 60-تان استام جاپىراقتى جانە قىلقان جاپىراقتى اعاش وتىرعىزىلدى. اعاشتاردىڭ جانىنا ساياباق ىرگەتاسىنىڭ قويىلعان كۇنى جازىلعان ەسكەرتكىش تاقتالار ىلىنەدى.

ساياباقتىڭ قۇرىلىسىن اياقتاپ، پايدالانۋعا بەرۋ 2023 -جىلعا جوسپارلانعان.

فوتو: gov.kz

رەداكتور

گۇلميرا الياكپاروۆا