ءدىني الۋانتۇرلىلىك السىزدىك ەمەس، ۇلكەن كۇش – ب ۇ ۇ باس حاتشىسىنىڭ ورىنباسارى
نۇر- سۇلتان. قازاقپارات - ءدىن ادام قۇقىقتارىن قۇرمەتتەۋ ءۇشىن كۇرەسۋدىڭ قۋاتتى قۇرالى بولىپ سانالادى.
بۇل تۋرالى ب ۇ ۇ باس حاتشىسىنىڭ ورىنباسارى ميگەل انحەل مارتينەس نۇر- سۇلتاندا الەمدىك جانە ءداستۇرلى دىندەر كوشباسشىلارىنىڭ VII سەزىندە ايتتى، دەپ حابارلايدى قازاقپارات ءتىلشىسى.
«بۇل باستامانىڭ قازاقستاندا تۋۋى كەزدەيسوق ەمەس. قازاقستاندا جۇزدەن استام ۇلت پەن كوپتەگەن ءدىني بىرلەستىكتەر تاتۋ تۇرىپ جاتىر. ادامزات قازىر ەكىنشى دۇنيەجۇزىلىك سوعىستان كەيىنگى تاريحتىڭ وتە ماڭىزدى كەزەڭىندە تۇر. ءبىز بارلىق دىندەردىڭ كۇش- جىگەرىن بىرىكتىرۋىمىز كەرەك جانە ءدىني الۋان تۇرلىلىك السىزدىك ەمەس، كۇش ەكەنىن ءتۇسىنۋىمىز كەرەك»، - دەيدى ميگەل انحەل مارتينەس.
سونىمەن بىرگە، ب ۇ ۇ باس حاتشىسىنىڭ ورىنباسارى ءار مادەنيەت پەن ءار ءدىندى قۇرمەتتەۋ قاجەتتىگىن ايتتى.
«ديسكريميناتسيا ءبارىمىزدىڭ قۇقىعىمىزدى بۇزادى، بۇل ءارقايسىمىزدىڭ تولىق الەۋەتىمىزدى اشۋعا مۇمكىندىك بەرمەيدى. ءدىن ادام قۇقىقتارىن قۇرمەتتەۋ ءۇشىن كۇرەسۋدىڭ قۋاتتى قۇرالى بولىپ سانالادى. قازىرگى ۋاقىتتا ب ۇ ۇ وركەنيەتتەر اليانسى ايتارلىقتاي قيىن جاعدايدا. گەوساياسي لاندشافتتاعى ەلەۋلى وزگەرىستەر، ۋنيپوليارلىق تەندەنتسياسى، ءدىني جانە ەتيكالىق سيپاتتامالار بويىنشا بولىنىستەر باتىس پەن باسقا الەم اراسىنداعى الشاقتىققا اكەپ سوعۋدا. وركەنيەتتەر اليانسى الەمنىڭ ءتۇرلى بولىكتەرى اراسىندا كوپىرلەر سالۋعا تىرىسادى. قازاقستان بۇكىل الەمدە كەلىسىم مەن بەيبىتشىلىكتى قامتاماسىز ەتۋ ءۇشىن وسى جۇمىستىڭ جانە وسى باستامانىڭ وتە ماڭىزدى بولىگى بولا الادى»، - دەدى ميگەل انحەل مارتينەس.
